Հասարակություն
ՆԱՏՕ-ի գլխավոր քարտուղարի հատուկ ներկայացուցչին է ներկայացվել տարածաշրջանային վերջին իրադարձությունները
ԱԺ պաշտպանության և անվտանգության հարցերի մշտական հանձնաժողովի նախագահ, ՆԱՏՕ ԽՎ-ում ՀՀ պատվիրակության ղեկավար Անդրանիկ Քոչարյանը, հանձնաժողովի անդամներն ու ՆԱՏՕ ԽՎ-ում ՀՀ պատվիրակության անդամները հանդիպել են Կովկասում և Կենտրոնական Ասիայում ՆԱՏՕ-ի գլխավոր քարտուղարի հատուկ ներկայացուցիչ Խավիեր Կոլոմինայի հետ:
Հանձնաժողովի նախագահ Անդրանիկ Քոչարյանը Խավիեր Կոլոմինային ներկայացրել է տարածաշրջանային վերջին զարգացումները և դրանց հետևանքով ստեղծված իրավիճակը, անդրադարձել Ադրբեջանի կողմից Լաչինի միջանցքի արգելափակմանը` ընդգծելով, որ Ադրբեջանը հերթական անգամ դիմել է սադրիչ գործողությունների:
ՆԱՏՕ ԽՎ-ում ՀՀ պատվիրակության ղեկավարը շնորհակալություն է հայտնել Կովկասում և Կենտրոնական Ասիայում ՆԱՏՕ-ի գլխավոր քարտուղարի հատուկ ներկայացուցչին 2022 թվականի սեպտեմբերյան իրադարձություններին արձագանքելու համար` կարևորելով միջազգային հանրության ուշադրությունն ու հասցեական արձագանքը տեղի ունեցողին:
ՆԱՏՕ-ի գլխավոր քարտուղարի հատուկ ներկայացուցիչը, ներկայացնելով այցի նպատակը, նշել է, որ մտահոգված է տարածաշրջանում տեղի ունեցող իրադարձություններով` հավելելով, որ ՆԱՏՕ-ն շահագրգռված է տարածաշրջանում կայունության և խաղաղության ապահովմամբ:
Հանդիպման ընթացքում կողմերը բարձր են գնահատել դեկտեմբերի 19-ին ավարտված ԵՄ դիտորդական առաքելության գործունեությունը: Հայկական կողմը ևս մեկ անգամ վերահաստատել է Հայաստանի պատրաստակամությունը` նպաստելու նոր քաղաքացիական առաքելության աշխատանքներին:
Քննարկվել են նաև Հայաստան-ՆԱՏՕ գործընկերության ներկայիս կարգավիճակին և տարածաշրջանային անվտանգությանն առնչվող մի շարք հարցեր, անդրադարձ է կատարվել երկկողմ համագործակցության զարգացման և ընդլայնման հնարավորություններին:
