Հասարակություն
«Արզու Ալիևայի ֆիլմի ցուցադրությունը Մոսկվայում բացահայտ սադրանք էր»․ ՌԴ-ում ՀՀ դեսպանություն
ՌԴ-ում ՀՀ դեսպանատունն իր խորին հիասթափությունն է հայտնում Համառուսաստանյան ցուցահանդեսային կենտրոնի (ՎԴՆԽ) տարածքում նոյեմբերի 9-ին ադրբեջանցի կինոպրոդյուսեր Արզու Ալիևայի կողմից Լեռնային Ղարաբաղի (Արցախի) խաղաղ բնակչության դեմ ագրեսիայի մասին նկարահանված ֆիլմի ցուցադրության կապակցությամբ։ Այս մասին դեսպանությունը հայտարարություն է տարածել։
«Այս գործողությունը դիտարկում ենք որպես բացահայտ սադրանք, որն ուղղված է ազգամիջյան տարաձայնությունների հրահրմանը և վերջին տարիներին գործադրված բազմաթիվ ջանքերի խափանմանը, որի նպատակը ինչպես Հայաստանի և Ադրբեջանի, այնպես էլ Ռուսաստանի տարածքում երկու երկրների համայնքների միջև հետագա լարվածություն թույլ չտալն էր:
«Շուշա, դու ազատ ես» օդիոզ վերնագրով վավերագրական ֆիլմն ադրբեջանական քարոզչության հերթական հակահայկական արտադրանքն է, որը ոչ միայն վիրավորում է Ռուսաստանի Դաշնության տարածքում բնակվող մեծաթիվ հայ համայնքի, ՀՀ-ում և ԼՂ-ում նրանց հայրենակիցների զգացմունքները, այլև ակնհայտ ուղեցույց է ադրբեջանական երիտասարդության համար, որին շարունակում են կրթել ատելության և այլատյացության սերմանմամբ։
Ակնհայտ է, որ նման գործողություններով ադրբեջանական կողմը միջազգային հանրության աչքում փորձում է արդարացնել ինչպես 2020 թ. պատերազմի, այնպես էլ 2021-2022 թթ. հետագա իրադարձությունների ժամանակ Լեռնային Ղարաբաղի խաղաղ բնակիչների և նրանց պաշտպանների դեմ իրականացված ծանրագույն պատերազմական հանցագործությունները, ագրեսիայի ընթացքում գրավված Լեռնային Ղարաբաղի տարածքի մի մասում շարունակվող վանդալիզմի գործողությունները:
Նշենք նաև, որ ադրբեջանական կողմը միտումնավոր ընտրել է իր տաղավարի վայրը՝ Համառուսաստանյան ցուցահանդեսային կենտրոնի տարածքը՝ նպատակ ունենալով վարկաբեկել ոչ միայն սիրելի ցուցահանդեսային կենտրոնը, որը քարոզում է ժողովուրդների բարեկամության և համագործակցության գաղափարները, այլ նաև այն երկիրը, որի ջանքերի շնորհիվ Հայաստանն ու Ադրբեջանը որոշեցին ընտրել խաղաղության և բարիդրացիության տանող ճանապարհը։
