Հասարակություն
Շատ ուրախ եմ, շատ խելոք են վարվում. Խաչատուր Սուքիասյանը՝ «Սիլ պլազայի» սեփականաշնորհման առթիվ քրեական գործի վերաբերյալ
ԱԺ «Քաղաքացիական պայմանագիր» խմբակցության պատգամավոր, «Սիլ գրուպ» ընկերության սեփականատեր Խաչատուր Սուքիասյանն անդրադարձել է «Սիլ պլազա» ընկերության շենքի սեփականաշնորհման գործընթացի հետ կապված քրեական գործին. «Ես երջանիկ եմ, շատ ուրախ եմ, շատ խելոք են վարվում, որովհետև պետական մարմինները պետք է մինչև վերջ հասկանան ի՞նչ է կատարվել՝ կապ չունի՝ ո՞ր ժամանակ։ Պետական մարմինը պետք է կարողանա վերջնական արդյունքում եթե պետությանը վնաս է հասցվել, օրենքի կետ է խախտվել, օրենքը պաշտպանել»։
Սուքիասյանը նշել է, որ ժամանակին իրենք ոչ թե շենք են սեփականաշնորհել, այլ՝ պատ. «Մի պատ է եղել, մոտավորապես 4 մետր բարձրության»։ Սուքիասյանը պատմել է, որ այդ բակում եղած փոքր տները գնել են, բնակիչներին փոխհատուցել՝ նրանց համար բնակարան գնելով, և այդ տարածքում էլ կառուցվել է «Սիլ պլազան»։
Նա վստահեցրել է, որ իրենք օրենք չեն խախտել. «Ի սկզբանե դրված է մեր ընտանիքում՝ ամեն ինչ պետք է անենք այն օրենքի սահմաններում որը գործում է ՀՀ-ում: Մենք օրենք չենք խախտում»:
