Հասարակություն
Երևանում երեխաների վրաերթի ենթարկած վարորդի ինքնությունը հայտնի է
Ոստիկանության Աարաբկիրի բաժնի քրեական հետախուզության և համայնքային ոստիկանության բաժանմունքների ծառայողները, ձեռնարկելով անհրաժեշտ օպերատիվ-հետախուզական միջոցառումներ, հայտնաբերել են սեպտեմբերի 9-ին Երևանում 2 երեխաների և մեկ 19-ամյա աղջկա վրաերթի ենթարկած վարորդին և նրա վարած ավտոմեքենան:
Ինչպես հայտնում է shamshyan.com-ը, այդ օրը՝ ժամը 22:30–ի սահմաններում, անհայտ մակնիշի և համարանիշի ավտոմեքենան Նաիրի Զարյան փողոցի 72 հասցեի դիմաց վրաերթի էր ենթարկել Երևանի բնակիչներ 15-ամյա Սարգիս Ա.-ին, 10-ամյա Ինեսա Հ.-ին, 19-ամյա Էլսիդա Հ.-ին: Վրաերթից հետո վարորդը, նրանց թողնելով անօգնական, հեռացել էր դեպքի վայրից, իսկ վրաերթի ենթարկվածները տեղափոխվել էին «Սուրբ Աստվածամայր» բժշկական կենտրոն, որտեղ շնորհիվ բժիշկների՝ հնարավոր է եղել փրկել նրանց կյանքը:
Նույն օրը դեպքի վայր էին ժամանել ՀՀ ոստիկանության պարեկային ծառայության Երևանի գնդի պարեկները և Հայաստանի քննչական կոմիտեի Երևան քաղաքի քննչական վարչության ճանապարհատրանսպորտային հանցագործությունների քննության բաժնի խումբը: Մինչ քննչական խումբն աշխատում էր դեպքի վայրում, ոստիկանության Արաբկիրի բաժնի պետ Երվանդ Նիկոյանը օպերատիվ տեղեկություններ է ստանում, որ վրաերթը կատարվել է Toyota Camry մակնիշի ռուսական համարանիշներով ավտոմեքենայի կողմից:
Արդեն ժամերի ընթացքում Արաբկիրի ոստիկանները պարզել են վարորդի ինքնությունն ու բացատրական աշխատանքների արդյունքում վարորդը՝ Երևանի բնակիչ, 34-ամյա Է. Բ.-ն, ինքնակամ ներկայացել է քննչական բաժին: Ավտոմեքենան քննիչի հանձնարարականով տեղափոխվել է ոստիկանության պարեկային ծառայության Երևանի գնդի պահպանվող հատուկ տարածք:
