ՀՀ գլխավոր դատախազությունը պահանջում է կրկին կալանավորել ՀՀ նախկին ոստիկանապետ Վլադիմիր Գասպարյանի թիկնազորի նախկին պետ Արշակ Հակոբյանին՝ «Վովայի Արշակին»։
ՀՀ դատախազության հանրային կապերի բաժնից Radar Armenia-ի հարցին ի պատասխան տեղեկացրին, որ վերաքննիչ բողոք է ներկայացվել՝ պահանջելով բեկանել Արշակ Հակոբյանի նկատմամբ 562 միլիոն ՀՀ դրամի չափով գրավը որպես խափանման միջոց կիրառելու մասին դատարանի որոշումը։
Հիշեցնենք, որ Արշակ Հակոբյանը մեղադրվում է հայտարարագրման ենթակա առանձնապես խոշոր չափերով գույքը դիտավորությամբ թաքցնելու (ՀՀ քրեական օրենսգրքի 314.3-րդ հոդվածի 2-րդ մասով /երկու դրվագ/ եւ հանցավոր ճանապարհով ստացված առանձնապես խոշոր չափերով գույքը օրինականացնելու (ՀՀ քրեական օրենսգրքի 190-րդ հոդվածի 3-րդ մասի 1-ին եւ 3-րդ կետերով) համար։
Արշակ Հակոբյանն օգոստոսի սկզբին 562 մլն դրամ գրավի դիմաց ազատ էր արձակվել։
