Հասարակություն
«Մենք ընտրել ենք «Ոչ մի վայրկյան դադար» սկզբունքը»․ ԱԻ փոխնախարար
«Սուրմալու» առևտրի կենտրոնի տարածքում հրդեհաշիջման աշխատանքներն ամբողջովին դադարեցվել են, բացառապես կենտրոնացած ենք որոնողափրկարարական աշխատանքների վրա։ Այս մասին լրագրողների հետ զրույցում հայտնեց ԱԻ փոխնախարար Արտուշ Գրիգորյանը։
«Քիչ առաջ հայտնաբերվեց 7-րզ զոհը, անձի ինքնությունը պարզվում է»,- ասաց ԱԻ փոխնախարարը։
Նրա խոսքով՝ հրդեհաշիջման նոր օջախներ երբեմն կարող են բռնկվել, սակայն կրակի տարածումն անմիջապես կանխվում է։
«Քննարկվում է սյուների վնասազերծման աշխատանքը, սակայն որոշակի բարդություններ կամ․ մասնագիտական քննարկում է հիմա իրականացվում, որպեսզի դրանց վնասազերծումից հետո ավելի շատ վնաս չպատճառենք։ Առաջիկա 1 ժամվա ընթացքում կունենանք որոշում, թե ինչպես պետք է վարվենք դեռևս կանգուն մնացած շինության նկատմամբ։ Փլուզման վտանգ դեռևս կա»,- ասաց Գրիգորյանը։
Խոսելով «Սուրմալու» առևտրի կենտրոնում նախորդ տարի կատարված ստուգումներից՝ Գաբրիելյանը նշեց՝ տեղյակ է խախտումների մասին, տրվել են կարգադրագրեր, սակայն այլ տեղեկություններ չունի։
«Կարող եմ ասել, որ կարգադրագրի ժամկետները ճկուն են ՝ կախված խախտումների բնույթից, ծավալից և նաև այն հանգամանքից, թե տվյալ տնտեսվարող սուբյեկտն ինչքան ողջամիտ ժամկետ կարող է խնդրել խախտումները վերացնելու ուղղությամբ»,- նշեց նա։
ԱԻ փոխնախարարը նշեց, որ իրենք առավել կենտրոնացած են որոնողափրկարարական աշխատանքների վրա։
«Թե որքան կտևեն այդ աշխատանքները, դժվար է ասել, կարող եմ հավաստիացնել՝ մենք ընտրել ենք «Ոչ մի վայրկյան դադար» սկզբունքը, և 24-ժամյա ռեժիմով որոնողափրկարարական աշխատանքները շարունակվում են։ Որքան շուտ կարողանանք փլատակներից ձերբազատվել, զուգահեռաբար ծանր տեխնիկա կարող է մուտք գործել՝ տարածքի մաքրման աշխատանքներին արագություն հաղորդելու համար»,- նշեց նա։
