Հասարակություն
526 պայմանագրային զինծառայող կօգտվի բնակարանի ձեռք բերման պետական ծրագրից
Կառավարության այսօրվա որոշմամբ 526 պայմանագրային զինծառայող կօգտվի բնակարանի ձեռք բերման պետական ծրագրից և կստանա վարկավորման համար անհրաժեշտ տեղեկանք:
Պաշտպանության փոխնախարար Արման Սարգսյանը տեղեկացրեց, որ նախատեսվում է ՊՆ համակարգի սպայական և ավագ ենթասպայական կազմերի, պայմանագրային զինծառայողների կողմից բնակարան կամ բնակելի տուն ձեռք բերելու կամ բնակելի տուն կառուցելու նպատակով մատչելի ու արտոնյալ պայմաններով երկարաժամկետ հիփոթեքային վարկավորման ծրագրից օգտվելու հնարավորություն ընձեռել 2022 թվականին դիմում ներկայացրած բոլոր զինծառայողներին:
Սարգսյանի խոսքով՝ ծրագրից առաջնահերթ օգտվելու հնարավորություն է տրվում նաև մինչև 2022 թվականի հուլիսի 1-ը ռազմաուսումնական հաստատություն ընդունված ու ՌՈՒ-ն ավարտելուց հետո հետուսումնական պայմանագրային զինվորական ծառայություն անցնող սպայական կազմի զինծառայողներին՝ ՌՈՒ ավարտելուց հետո 5 տարվա ընթացքում դիմելու դեպքում:
Փոխվարչապետ Համբարձում Մաթևոսյանն ասաց, որ այս նախագիծը վերաբերում է զինծառայողների համար արտոնյալ պայմաններով հիփոթեքային վարկավորման ծրագրին, որի դեպքում ձեռք բերվող բնակարանների մայր գումարի 10 տոկոսը ու վարկի 7 տոկոս կազմող տոկոսադրույքի 3 տոկոսը սուբսիդավորվում է պետության կողմից:
Ըստ նրա. «2022 թվականի սույն ծրագրից օգտվելու դիմումներով հաշվառվել է 1018 զինծառայող, նրանցից առաջնահերթության կարգով ու վիճակահանությամբ տեղեկանք է տրվել 492 զինծառայողի, իսկ այս նախագծի ընդունման դեպքում մնացած 526 զինծառայողին ևս կհատկացվի վարկավորման համար անհրաժեշտ տեղեկանքը»։
Համբարձում Մաթևոսյանն ասաց, թե բոլոր 1018 զինծառայողները հնարավորություն կունենան օգտվելու արտոնյալ պայմաններով հիփոթեքային վարկավորումից:
