Հասարակություն
ԱՊՊԱ պայմանագիր չկնքած անձանց 24 ժամ հնարավորություն կտրվի կրճատել տուգանքի չափը
Ազգային ժողովն արտահերթ նիստում ընդունեց Վարչական իրավախախտումների վերաբերյալ ՀՀ օրենսգրքում փոփոխությունների նախագիծը։
Ըստ այդմ, ԱՊՊԱ պայմանագիր չկնքած անձին տրվում է հնարավորություն իրավախախտումը հայտնաբերելու պահից 24 ժամվա ընթացքում իրավախախտման հատկանիշները վերացնելու դեպքում ազատվել նշանակված տուգանքի 75 տոկոսից:
ԱԺ ՔՊ խմբակցության պատգամավոր Արմեն Խաչատրյանն այս կապակցությամբ մանրամասնել է. «Առավելագույն 100 000 դրամի փոխարեն քաղաքացիները կտուգանվեն 50 000 դրամով այն դեպքում, երբ չունեն ԱՊՊԱ պայմանագիր, չեն վարել տրանսպորտային միջոցը:
Ներկայում այս կարգավորումներով ՃՈ-ն տարվա մեջ 20 անգամ կարող է 5000-ական դրամի չափով տուգանք սահմանել այն անձանց նկատմամբ, ովքեր ունեն տրանսպորտային միջոց, սակայն չեն կնքել ԱՊՊԱ պայմանագիր:
Հիմա նվազեցրել ենք իրավախախտումների վերաբերյալ որոշումներ կայացնելու քանակը և սահմանել ենք տարեկան 10 անգամից ոչ ավելի՝ ընդհանուր չգերազանցելով 50 հազար դրամը: Միջին ապահովագրությունը Հայաստանում 35-40 հազար դրամ է, հետևաբար տրամաբանական չէ անձին 100 հազար դրամով տուգանելը»։
