Գիտնականները նախազգուշացնում են օվկիանոսներում հնարավոր «ռեժիմային փոփոխության» մասին, ջրիմուռների հսկայական կուտակումների ֆոնին։ Ջրիմուռների արագ աճը պայմանավորված է գլոբալ տաքացմամբ և գյուղատնտեսական արտահոսքերից ու այլ աղտոտիչներից ջրերի չափից ավելի հարստացմամբ:
Վերջին երկու տասնամյակների ընթացքում արևադարձային Ատլանտիկայում և Խաղաղ օվկիանոսի արևմտյան հատվածում ջրիմուռների ծաղկման տարածքներն աճել են տարեկան 13,4%-ով։ Այս մասին փաստում են Հարավային Ֆլորիդայի համալսարանի (USF) հետազոտողները։ Իրենց նոր աշխատության մեջ նրանք նշում են, որ այս տեղաշարժը կարող է մթնեցնել ջրի ստորին շերտերը՝ փոխելով դրանց էկոլոգիան և գեոքիմիան:
Գիտնականներն օգտագործել են արհեստական բանականություն՝ սկանավորելու 2003-2022 թվականներին արված 1,2 միլիոն արբանյակային լուսանկար։ Լողացող ջրիմուռների ազդանշանները հայտնաբերելու համար կիրառվել է խորը ուսուցման (deep-learning) մոդել, ինչը տևել է մի քանի ամիս:
Հետազոտողների խումբը պարզել է, որ մակրոջրիմուռների ծաղկման տարածքը տարեկան աճել է 13,4%-ով, մինչդեռ միկրոջրիմուռների (օրինակ՝ ֆիտոպլանկտոնի) աճը եղել է ավելի համեստ՝ տարեկան մոտ 1%:
Գիտնականները եզրակացնում են, որ եթե օվկիանոսային պայմանների այս փոփոխությունն արդեն տեղի է ունեցել հօգուտ մակրոջրիմուռների, ապա դա խորը ազդեցություն կունենա մթնոլորտի ջերմային ճառագայթման, օվկիանոսում լույսի հասանելիության, ինչպես նաև ածխածնի կլանման և օվկիանոսի կայունության վրա:
