Radar Armenia-ն ներկայացնում է ՀՀ առաջին նախագահի Լևոն Տեր-Պետրոսյանի հրաժարականից հետո միջազգային գործընկերների արձագանքը։ Հոդվածը հրապարակվել է «Հայաստանի Հանրապետություն» օրաթերթի 1998թ. փետրվարի 4-ի համարում։
Մենք լավ էինք փոխգործակցում
Ռուսաստանի նախագահ Բորիս Ելցինը ափսոսանք է հայտնել Հայաստանի նախագահ Լևոն Տեր-Պետրոսյանի հրաժարականի առթիվ՝ կանխատեսելով, որ նրան կփոխարինեն «կոշտ» մարդիկ, որոնք, այդուհանդերձ, կշարունակեն համագործակցությունը Ռուսաստանի հետ։ «Ես ափսոսում եմ, որ նա հեռացավ: Ինձ դուր է գալիս նրա հետ աշխատելը, նա հանգիստ է աշխատում, հանգիստ լուծում խնդիրները, և մենք լավ էինք փոխգործակցում ԱՊՀ-ում»,- ըստ ԻՏԱՈ-ՏԱՍՍ-ի՝ հայտարարել է ռուսական պետության ղեկավարն ու ավելացրել. «Կգան նոր ղեկավարներ, ուրիշ մարդիկ: Սա պետք է մենք նկատի ունենանք: Այժմ կգան, թերևս, կոշտ մարդիկ: Բայց նրանք հասկանում են, որ իրենք պետք է բարեկամություն անեն և գործ ունենան Ռուսաստանի հետ: Եվ մենք դա պետք է հասկանանք»։
«Հայաստանը ուղղափառ երկիր է, մտնում է Ռուսաստանի շահերի ռազմավարական դաշտի մեջ: Չի կարելի կորցնել Հայաստանը, ինչն էլ մենք չենք անի»,- նշել է նա։ Բորիս Ելցինը Տեր-Պետրոսյանին առաջարկել է օգնել ստեղծված ճգնաժամային կացության մեջ։ Սակայն Երևանի «ներկառավարական» քաղաքականությունը հաղթել է․
«Վերջին ամիսներին մի քանի անգամ հեռախոսազանգ եմ ունեցել նրա հետ: Միջնորդներ ենք ուղարկել: Ուզում էինք օգնել նրան, որովհետև նա իր շուրջը ստեղծել էր մի շրջանակ, որը բաղկացած էր այնպիսի մարդկանցից, որոնք բոլորն էլ դեմ են իրեն: Նա չէր կարող դիմանալ դրան: Ես օգնություն առաջարկեցի նրան, բայց դա կառավարական խնդիր է, երբ մեկը հանդես է գալիս մյուսի դեմ, մեկ ուրիշը՝ Տեր-Պետրոսյանի»,- ասել է Ռուսաստանի նախագահը։
Հրավիրել է Ֆրանսիա
Երեկ Լևոն Տեր-Պետրոսյանին է զանգահարել Ֆրանսիայի նախագահ Ժակ Շիրակը, որն իր ափսոսանքն է արտահայտել նրա հրաժարականի առթիվ։ Ժակ Շիրակը հույս է հայտնել, որ, բոլոր դեպքերում, խաղաղության գործընթացը հաջողության կհասնի, ու ևս մեկ անգամ հավաստել է Ֆրանսիայի և Հայաստանի բարեկամությունը։ Ֆրանսիայի նախագահը նաև Լևոն Տեր-Պետրոսյանին հրավիրել է իրեն հարմար ժամկետում աշխատանքային այցով այցելել Ֆրանսիա:
Մոսկվան բարձր էր գնահատում
Մոսկվան հույս ունի, որ Հայաստանի նոր ղեկավարությունը կպահպանի կշռադատված մոտեցումը Ղարաբաղի հիմնախնդրի նկատմամբ․ երեկ հայտարարել է ռուսական պետության ղեկավարի մամլո քարտուղար Սերգեյ Յաստրժեմբսկին։ Պատասխանելով լրագրողների հարցերին, նա ասել է։ «Մոսկվան միշտ բարձր է գնահատում Տեր-Պետրոսյանի ճկուն, կշռադատված քաղաքականությունը Ղարաբաղի հիմնախնդրի կարգավորման հարցերում։ Եվ մենք հաստատապես հույս ունենք, որ Հայաստանի ղեկավարությունը կպահպանի հենց նման մոտեցումը, որի նպատակն է հաշվի առնել հակամարտության մեջ ներքաշված բոլոր կողմերի շահերը»։
Գ. Սելեզնյովը ձեռնպահ է
Ռուսաստանի Պետական դումայի նախագահ Գենադի Սելեզնյովն առայժմ պատրաստ չէ մեկնաբանել Հայաստանի բարձրաստիճան պաշտոնատար անձանց հրաժարականները։ Երեկ պատասխանելով լրագրողների հարցերին` Սելեզնյովն ասել է, թե ինքը «գիտե այն իրադարձությունների մասին, որոնք տեղի են ունեցել Հայաստանում, որտեղ հրաժարական են տվել հանրապետության նախագահն ու խորհրդարանի նախագահը», բայց «առայժմ պատրաստ չէ» մեկնաբանելու դրանք։
Ցավում է, բայց հուսով է
Ռուսաստանի Պետդումայի առաջին փոխնախագահ Վլադիմիր Ռիժկովը հուսով է, որ Հայաստանի բարձրաստիճան անձանց հրաժարականները չեն խաթարի ռուս-հայկական հարաբերությունները և Լեռնային Ղարաբաղում չեն հանգեցնի իրադրության բարդացման։ Լրագրողների հետ կայացած զրույցի ժամանակ Ռիժկովն ասել է։ «Ես ցավում եմ, որ Հայաստանի նախագահ Լևոն Տեր-Պետրոսյանը հրաժարական է տվել, բայց հույս ունեմ, որ հանրապետության ղեկավարության մեջ տեղի ունեցող փոփոխությունները չեն խաթարի Ռուսաստանի և Հայաստանի հարաբերություններին»։ Վլադիմիր Ռիժկովը հիշեցրել է, որ հունվարի 23-ին Դուման «հանդիսավորապես վավերացրեց Հայաստանի հետ պայմանագիրը, որը պատրաստվել է Լևոն Տեր-Պետրոսյանի մասնակցությամբ»։
Ք. Քինկելը հանդես է եկել հօգուտ բանակցությունների շարունակման
Գերմանիայի արտգործնախարար Քլաուս Քինկելը երեկ հանդես է եկել հայտարարությամբ, որում ընդգծել է Լեռնային Ղարաբաղի հակամարտության կարգավորման շուրջ բանակցությունները հետևողականորեն շարունակելու անհրաժեշտությունը։ Չնայած հակամարտող կողմերի կարծիքներում պահպանվող լուրջ տարբերություններին, մատնանշվում է հայտարարության մեջ,- «վերջին ամիսներին հաջողվել է հասնել այնպիսի մոտեցումների, որոնք «հուսադրող են»: Այս առաջխաղացումը չպետք է այժմ հարցականի տակ դրվի»։
Ալիևը նույնպես հավատը չի կորցնում
«Ադրբեջանը կանգնած է եղել և այսուհետև էլ կանգնած կլինի Լեռնային Ղարաբաղի պատճառով ծագած հայ-ադրբեջանական հակամարտության խաղաղ կարգավորման դիրքերում»,- հայտարարել է Ադրբեջանի նախագահ Հեյդար Ալիևը։ Նա երեկ լրագրողների առջև հանդես եկավ հատուկ հայտարարությամբ՝ կապված հարևան անդրկովկասյան հանրապետության իրավիճակի և Հայաստանի նախագահի պաշտոնից Լևոն Տեր-Պետրոսյանի հրաժարականի հետ։ Նախագահի խոսքերով, Ադրբեջանի ղեկավարությունը անհանգստությամբ էր հետևում Հայաստանի վերջին դեպքերին։ Ինչպես հաղորդել է ԻՏԱՌ-ՏԱՍՍ-ը, Հեյդար Ալիևը որպես մեծ նվաճում է գնահատել մարտական գործողությունների գոտում հրադադարը, որն այնտեղ հաստատվել է 1994 թվականի մայիսից։ «Ադրբեջանի և Հայաստանի ջանքերով անցած տարիներին հաջողվեց պահպանել զինադադարը, մենք հավատարիմ կլինենք հրադադարի ռեժիմին և ամեն ինչ կանենք, որպեսզի ապահովենք դրա պահպանումը»,- հայտարարեց Հեյդար Ալիևը։
Ադրբեջանի նախագահը հույս է հայտնել, որ Հայաստանի ներքին իրադրությունը շուտով կկայունանա, և կողմերը կշարունակեն ղարաբաղյան հիմնախնդրի խաղաղ կարգավորման բանակցությունները 1996 թվականի դեկտեմբերին Լիսաբոնում կայացած ԵԱՀԿ գագաթնաժողովում հռչակված սկզբունքների հիման վրա։ «Ես հավատում եմ, որ ԵԱՀԿ Մինսկի խմբի համանախագահների՝ Ռուսաստանի, ԱՄՆ-ի և Ֆրանսիայի մասնակցությամբ ու միջնորդությամբ բանակցությունների խաղաղ գործընթացը կշարունակվի, և արդեն ձեռք բերվածի հիման վրա մենք կհասնենք լիակատար խաղաղության»,- հայտարարել է Հեյդար Ալիևը։ Ադրբեջանի նախագահի հայտարարությանը նախորդել է հանրապետության անվտանգության խորհրդի նիստը, որում քննության են առնվել Հայաստանի վերջին իրադարձություններին առնչվող հարցեր։
