Radar Armenia-ն ներկայացնում է «Հայաստանի Հանրապետություն» թերթի՝ 1992թ. մայիսի 16-ի անդրադարձն Ադրբեջանում հայտարարված արտակարգ դրությանը։
Արտակարգ դրություն Բաքվում
Ադրբեջանի նախագահ Այազ Մութալիբովի հրամանագրով մայիսի 15-ին Բաքու քաղաքի տարածքում երկու ամսով մտցվել է արտակարգ դրություն։
Պետության ղեկավարը այդ որոշումն ընդունել է հանրապետության սահմանադրության 121-4 հոդվածի 16-րդ կետին համապատասխան՝ Բաքվի հասարակական-քաղաքական իրավիճակը կայունացնելու և Ադրբեջանի դեմ Հայաստանի ագրեսիայի ծավալման առաջացրած արտակարգ պայմաններում պետական հաստատությունների բնականոն գործունեությունն ապահովելու նպատակով, ինչպես նաև հասարակական, քաղաքական ռազմական ներուժը հանրապետության ինքնիշխանության և նրա տարածքային ամբողջականության պաշտպանությանը ծառայեցնելու, քաղաքացիների անվտանգությունը երաշխավորելու համար։
Բաքվում իրավիճակը սրվում է
Ադրբեջանի ժողովրդական ճակատի՝ Յաղուբ Մամեդովին և Այազ Մութալիբովին հասցեագրված դիմումի տեքստն ընթերցվել է երեկ հանրահավաքում, որն անցկացվում է այդ հասարակական-քաղաքական կազմակերպության կենտրոնակայանի մոտ։ Իրենց ելույթներում ճակատի լիդերները նշում են, որ նախօրեի խորհրդարանի նիստում ընդունված որոշածները իրավական ուժ չունեն և, քանի դեռ ուշ չէ, դրանք պետք է չեղյալ հայտարարվեն։
Դիմումի մեջ առաջարկված է մինչև տեղական ժամանակով ժամը 13։00 կատարել այդ պահանջը։ Հակառակ դեպքում ժողովրդական ճակատը պատրաստ է պաշտպանել հանրապետության սահմանադրությունը։
Հանրահավաքում ընթերցվել են ժողճակատի պահանջները պաշտպանող հեռագրեր, որոնք ստացվել են հանրապետության մի շարք շրջաններից։
Ադրբեջանի ժողովրդական ճակատը դեմ է Մութալիբովին
Ադրբեջանի ժողովրդական ճակատը նախագահի պաշտոնում Մութալիբովի վերահաստատվելը գնահատում է որպես «պետական հեղաշրջում»։ Ի նշան բողոքի, ԱԺՃ-ն, որի պատգամավորները ներկա չէին հանրապետության Գերագույն խորհրդի մայիսի 14-ին կայացած նիստին, քաղաքացիական անհնազանդության ձեռնարկումներ է նախատեսում:
Թուրքիան մտահոգված է Ադրբեջանի իրադարձությունների զարգացմամբ
Թուրքիան մտահոգությամբ է հետևում Ադրբեջանի իրադարձությունների զարգացմանը, -ասվում է երկրի արտգործնախարարության հայտարարության մեջ,- և ազգային միասնության ու ողջախոհության կոչ է անում ադրբեջանական ժողովրդին։
Ինչպես հաղորդել է «Միլիեթ» թերթը, Թուրքիայի իշխանությունները որոշում են ընդունել մայիսի 15-ից ուժեղացնել այն ինքնաթիռների ստուգումները, որոնք Հայաստանի համար մարդասիրական օգնության բեռներով թռչում են Թուրքիայի օդային տարածքով։
Հինգշաբթի Թուրքիա ժամանեց Ադրբեջանի ազգային անկախության կուսակցության նախագահ Էհթիբար Մամեդովը։
Հիմնական ընդդիմադիր «Հայրենիք» կուսակցության նախագահ Մեսուդ Յըլմազի և Թուրքիայի արտգործնախարարության ներկայացուցիչների հետ կայացած զրույցի ժամանակ նա Թուրքիային կոչ արեց դիմել ավելի եռանդուն գործողությունների:
