«Ժողովուրդ» օրաթերթը գրում է. «8 ամիս առաջ Մերձավանում ՔՊ-ական Մհեր Ախտոյանի և Վալոդյա Գրիգորյանի թիմակիցների միջև հնչած կրակոցների գործը վարած քննիչ Սևակ Խաչատրյանը նոր պաշտոն ստացավ. ոչ ավել ոչ պակաս՝ նա նշանակվել է Արմավիրի մարզային քննչական վարչության պետ։
Մինչդեռ եթե 7 ամիս առաջ քննիչ Սևակ Խաչատրյանը օբյեկտիվ քններ և պատասխանատվության կանչեր բոլոր կողմերին՝ չշրջանցելով Մերձավանի նախկին ղեկավար ՔՊ-ական Մհեր Ախտոյանին, որը տանից նստած հետևում էր ու փաստացի նկարում, թե ինչպես են մի խումբ երիտասարդներ անխնա ծեծում միմյանց, ինչի հետևանքով սպանվեց Գրիգոր Օհանյանը, ապա մյուս կրակոցները Մերձավանում չէին հնչի։
Ի վերջո, արդյոք քննիչ Սևակ Խաչատրյանը չէ՞ր տեսել տեսանյութը, որտեղ ՔՊ-ական Մհեր Ախտոյանը, Մերձավանի կրակոցների օրը հայտարարում է. «Վալո՛դ, գլուխդ ուտելու եմ», և 7 ամիս անց սպանվում է Վալոդյա Գրիգորյանը։
Ահա, Սևակ Խաչատրյանի վարույթում քննվող գործը մի շարք հարցեր է առաջ քաշում. պաշտոնից ազատվում է իր նախկին ղեկավարը, իսկ ամիսներ անց հենց ինքն է պաշտոն ստանում։
Հրամանը ստորագրվել է 2025 թվականի նոյեմբերի 12-ին՝ հիմք ընդունելով ՀՀ քննչական կոմիտեի որակավորման հանձնաժողովի 2025 թվականի նոյեմբերի 05-ի եզրակացությունը և ղեկավարվելով «Հայաստանի Հանրապետության քննչական կոմիտեի մասին» Հայաստանի Հանրապետության օրենքի 12-րդ հոդվածի 2-րդ մասի 3-րդ կետով և 20-րդ հոդվածի 7-րդ մասով։
Հրամանով արդարադատության երկրորդ դասի խորհրդական Սևակ Խաչատուրի Խաչատրյանը նշանակվել է ՀՀ քննչական կոմիտեի Արմավիրի մարզային քննչական վարչության պետ՝ ազատվելով ՀՀ քննչական կոմիտեի հատկապես կարևոր գործերի քննության գլխավոր վարչության՝ մարդու դեմ ուղղված հանցագործությունների քննության վարչության պետի տեղակալի պաշտոնից»։
