«Ժողովուրդ» օրաթերթը գրում է. «Մելիքբեկյան-Նիկողոսյան զույգի տարիների անփառունակ կառավարման արդյունքում հայ ֆուտբոլասերները գլխիկոր են հեռանում մարզադաշտերից։
Այլ հարց է ՈՒԵՖԱ-ի նախագահ Ալեքսանդր Չեֆերինի գործոնը. մեզ տեղեկություններ են հասնում, որ Արմեն Մելիքբեկյանը գլուխ է գովում ամենուր, որ Չեֆերինն իր ընկերն է` դրանով թերևս ավելացնելով իր կշիռը Կառավարությունում:
Ավելին` ՈՒԵՖԱ-ի գործկոմի անդամության թեկնածու Արմեն Մելիքբեկյանը այդ կառույցի նախագահի ընտրություններում պաշտպանել է վերջինիս ու սպասվող ընտրություններում ևս ամենայն հավանականությամբ կանի նույնը. դա, ըստ էության, Հայաստանի ձայնն է։
Զավեշտալին այն է, որ ՖԱՖ հիմնադիր Սերգեյ Ջանջոյանի՝ Մելիքբեկյանի ՈՒԵՖԱ գործկոմ գնալու մասին հրապարակային քննադատությանն ի պատասխան ՀՖՖ-ն պաշտոնական էջով գրառում արեց, որտեղ ամենակարևոր հատվածներից էր այն, թե իբր Մելիքբեկյանը ՈՒԵՖԱ-ում անելիք ունի, և որ ֆուտբոլի զարգացման ծրագիր կա։ Այս մասը հատկապես զվարճացրել էր հայ երկրպագուներին։
Ի մի բերելով արձագանքները` կարող ենք գեներացնել հարց ՈՒԵՖԱ-ի նախագահին. մի՞թե վերջինս գոհ է հայկական ֆուտբոլում գրանցված արդյունքներից, մի՞թե նա չի տեսնում ենթադրյալ անօրինականությունները, ի՞նչն է ստիպում նրան Հայաստանում աչք փակել կատարվող իրադարձությունների վրա, տեղյա՞կ է արդյոք, որ ՀՖՖ-ն պարտքեր է կուտակել, ի՞նչ օգուտ է տալու Հայաստանում ձախողված Մելիքբեկյանը ՈՒԵՖԱ-ում, ինչո՞ւ Չեֆերինը չարձագանքեց հայ երկրպագուների ձերբակալություններին, մամուլում ժամանակ առ ժամանակ հայտնվող, մեղմ ասած, ուշադրության արժանի երևույթներին ևս:
Հ.Գ Մեր տեղեկություններով` մի շարք հայ երկրպագուներ մոտ ապագայում կդիմեն Շվեյցարիայի դատախազություն՝ ՈԵՖԱ-ՀՖՖ հնարավոր անառողջ կապերի վերաբերյալ։ Գործընթացը կարող է ուղեկցվել միջազգային մամուլի հրապարակումներով ու Չեֆերինին ուղղված բաց նամակով հենց Շվեյցարիայից, որտեղ ՈՒԵՖԱ շտաբ-բնակարանն է»։
