Մամուլ
Մայր աթոռում ովքե՞ր են դեմ եղել իշխանություններին հրավեր ուղարկելուն․ «Հրապարակ»
«Հրապարակ» օրաթերթը գրում է․ «Հայաստանյայց Առաքելական եկեղեցու Գերագույն հոգևոր խորհուրդը, որը կազմված է 22 անդամից (Վեհափառը, 14 սրբազաններ, 2 պատրիարք և աշխարհականներ), ինչպես հայտնի է, իր վերջին ժողովում քննարկել և որոշում էր կայացրել Մայր տաճարի վերաօծման և Մյուռոնօրհնության արարողությունների կազմակերպան մասին: Մասնավորապես` որոշել էր հրավիրատոմսեր ուղարկել մի քանի հարյուր անձի` գործող և նախկին իշխանությունների ներկայացուցիչներ, հանրային գործիչներ, բարերարներ: Տաճարի ներսում տեղերը սահմանափակ են և մուտքը թույլատրված է միայն հրավիրատոմսերով:
Մենք պարզեցինք, որ այդ ժողովի ժամանակ բավականին երկար քննարկում է գնացել, հակադիր կարծիքներ են հնչել: Առաջարկ է եղել` ոչ մի հրավիրատոմս էլ չուղարկել, հատկապես` գործող իշխանություններին։ Սակայն այս տեսակետը պաշտպանել են Հոգևոր Խորհրդի 22 անդամից միայն երեքը` Միքայել արքեպիսկոպոս Աջապահյանը, Արշակ արքեպիսկոպոս Խաչատրյանը և մի կեսբերան` Արցախի թեմի առաջնորդ Վրթանես եպիսկոպոս Աբրահամյանը:
Մնացյալը բոցաշունչ ճառեր են ասել պետության, պետականության, իշխանության հետ` որպես պետության ներկայացուցիչների, հարաբերություններ հաստատելու անհրաժեշտության մասին, մեծ բավականություն պատճառելով Վեհափառին, ով միշտ կողմնակից է իշխանությունների հետ «տալ առնելուն» և պատրաստ է ներել անգամ իր հասցեին ասված բոլոր վիրավորական խոսքերը:
Ամենազավեշտականն այն է, որ Հոգևոր խորհրդի որոշումը հրապարակայնացրել է Մայթ Աթոռի դիվանապետը՝ Արշակ սրբազանը, որն անձամբ դեմ է եղել հրավերներ ուղարկելուն»։
