Մամուլ
Ինչո՞ւ գերիների վերադարձի օրը հայկական ԶԼՄ-ների այց չէր կազմակերպվել. «Ժողովուրդ»
«Ժողովուրդ» օրաթերթը գրում է . «Դեկտեմբերի 13-ին Ղազախ-Իջևան սահմանին Հայաստանն ու Ադրբեջանը գերիների փոխանակում իրականացրին:
Ադրբեջանը վերադարձրեց 32 հայի, իսկ Հայաստանը՝ 2 ադրբեջանցու։
Գերիների վերադարձի գործընթացից հետո համացանցում և հանրության շրջանում բուռն քննարկվեց նաև այն, որ սահմանին գերիների փոխանակումն իրականացնելու գործընթացը լուսաբանում էին միայն ադրբեջանական լրատվամիջոցները, իսկ հայկական ԶԼՄ-ներն այնտեղ չէին:
Մինչ ադրբեջանական պետական լրատվամիջոցները մեծ շուքով լուսաբանում էին գործընթացը, հայկական լրատվամիջոցները հնարավորություն չեն ունեցել անգամ գնալ սահման՝ լուսաբանելու հանրության համար այդ խիստ կարևոր ու սպասված իրադարձությունը:
Տհաճ իրավիճակ էր ստեղծվել նաև այն առումով, որ հայկական կողմը գերիների վերադարձի կոնկրետ տեղի և ժամի մասին տեղեկանում էր ադրբեջանական լրատվամիջոցներից:
«Ժողովուրդ» օրաթերթը դիմեց ՀՀ կառավարություն՝ պարզելու, թե ինչու հայկական ԶԼՄ-ների այցը սահման չէր կազմակերպվել։
«Նպատակահարմար է համարվել այդպես կազմակերպել, այս դեպքում կարևորը գերիների վերադարձն է:
Այս դեպքում կարևոր է համարվել, որպեսզի առաջնահերթ կերպով գերիների վերադարձը կազմակերպվի»,- ասաց Տեղեկատվության և հասարակայնության հետ կապերի վարչության պետ Արմեն Խաչատրյանը»:
