«Հրապարակ» օրաթերթը գրում է. «Անդրանիկ Քոչարյանի ղեկավարած՝ 44-օրյա պատերազմի հանգամանքներն ուսումնասիրող ԱԺ քննիչ հանձնաժողովի լիազորությունների ժամկետը մի քանի օրից լրանում է, սակայն ՔՊ-ական հանձնաժողովականներն այլևս չեն շտապում «հարցաքննության» կանչել որևէ նախկին կամ ներկա պաշտոնյայի։
Հիշեցնենք․ 2023 թ. մայիսի 3-ին երկրորդ անգամ էր 6 ամսով երկարաձգվել 2020 թ. պատերազմի հանգամանքներն ուսումնասիրող ԱԺ քննիչ հանձնաժողովի գործունեության ժամկետը, որի նախագահ Անդրանիկ Քոչարյանը վստահեցրել էր, որ սա վերջին երկարաձգումն է լինելու։ Այսինքն՝ հանձնաժողովի լիազորությունների ժամկետը նոյեմբերի 3-ին լրանում է։
Հանձնաժողովի վերջին հյուրը պաշտպանության նախկին նախարար Դավիթ Տոնոյանն էր, նախատեսում էին տեսակապով հարցաքննել ԱՀ նախկին նախագահ Արայիկ Հարությունյանին, ով ադրբեջանական գերության մեջ է ավելի քան մեկ ամիս, ինչպես նաև՝ ՊԲ նախկին հրամանատար Ջալալ Հարությունյանին։ Սակայն Արցախը հանձնելուց հետո ՔՊ-ականներն էլ թերևս հասկացել են, որ զավեշտի ժանրից է լինելու 20 թվի պարտության մեղավորներ հռչակելը»։
