«Ժողովուրդ» օրաթերթը գրում է. «Հայաստանի խորհրդարանի վերանորոգման և «ռեստավրացիայի» աշխատանքներում նաև իրանցիներ են ներգրավված:
«Ժողովուրդ» օրաթերթը գրել էր, որ ողջ ամառ ԱԺ-ում բուռն վերանորոգումներ են ընթացել. բացօթյա սրճարանի համար տարածքն է կառուցվել, հանձնաժողովների նիստերի համար նախատեսված սենյակներն են վերանորոգվել, այս օրերին էլ հայրենի խորհրդարանի վերելակներն են փոխվում: «Ժողովուրդ» օրաթերթը երեկ խորհրդարանում նկատեց, որ վերանորոգման գործընթացում նաև մի խումբ իրանցիներ են ներգրավված:
ԱԺ հասարակայնության հետ կապերի և հաղորդակցության վարչության պետ Լաուրա Անտոնյանը մեզ հետ զրույցում հաստատեց տեղեկությունը՝ պարզաբանելով՝ «Արև-Լույս-Կասկադ» մասնագիտացված վերելակային ընկերությունը մասնակցել է էլեկտրոնային աճուրդին և ամենացածր գինն է առաջարկել ԱԺ-ի վերելակները փոխելու համար, հետևաբար շահել է տենդերը. «Այդ ընկերությունը նաև վերելակների արտադրությամբ է զբաղվում, նրանց մոտ երկու իրանցի մասնագետ կա, որոնք տեխնիկական աշխատանքներում են ներգրավված, որպեսզի տեղադրման հետ կապված խնդիրներ չլինեն: Բացի երկու իրանցի մասնագետներից, կազմակերպությունն ունի նաև 6 հայ աշխատակիցներ, այսինքն՝ ընդհանուր 8 հոգով են վերելակները տեղադրում»»:
