«Ժողովուրդ» օրաթերթը գրում է. «Երևանի քաղաքապետարանը պարբերաբար տեղեկացնում է քաղաքի այս կամ այն հատվածում տեղի ունեցող գծանշումների մասին, որոնք հիմնականում կատարվում են գիշերային ժամերին երթևեկությանը այդքան շատ չխոչընդոտելու համար: Նախազգուշացումներին հաջորդող մի քանի օրերին էլ որոշ փողոցներում եղած վառ գծանշումները կարծես հույս են ներշնչում, թե քաղաքային իշխանությունները հավուր պատշաճի կատարում են իրենց աշխատանքը, իսկ ստեղծված ժամանակավոր անհարմարություններին կարելի է ըմբռնումով մոտենալ. հո ամեն օր գծանշում չե՞ն անում այս մարդիկ:
Գովելի է, ինչ խոսք: Սակայն սա հարցի միայն լուսավոր կողմն է: Շարժվենք առաջ: Լավագույն դեպքում՝ շաբաթներ անց, վատագույն դեպքում օրեր անց նույն փողոցներով անցնելիս կարելի է նկատել գծանշումներ թարմացնող անձանց, քաղաքապետարանի կողմից էլ՝ հերթական տեղեկությունը։ Փաստորեն, «ամե՞ն օր» գծանշում են թարմացնում:
«Ժողովուրդ» օրաթերթը Երևանի քաղաքապետարանից փորձեց ճշտել, թե որքան գումար են ծախսել ներկանյութերի վրա երկու տարվա կտրվածքով՝ 2021 թվականի օգոստոսի 1-ից առ այսօր, և ինչպես են ընտրում, թե ինչ ներկով են գծանշումներ կատարելու։ Ի պատասխան՝ մեզ ասացին, որ տրանսպորտի բնագավառում Երևանի քաղաքապետին վերապահված լիազորությունները կարգավորված են «Երևան քաղաքում տեղական ինքնակառավարման մասին» ՀՀ օրենքով, որի 57-րդ հոդվածի 2-րդ կետի 1-ին մասի համաձայն` Երևանի ճանապարհային գծանշումների, ինչպես նաև երթևեկության նշանների և լուսացույցների տեղադրման միջոցով ճանապարհային երթևեկության կարգավորումը դասվում է տրանսպորտի և ճանապարհաշինության բնագավառում քաղաքապետին վերապահված պատվիրակված լիազորությունների թվին: Վերը նշված լիազորությունները Երևանի քաղաքապետին պատվիրակվել են 2022 թվականից: 2022 թվականի հունվարից մինչ օրս Երևան քաղաքում գծանշումների համար ծախսվել է շուրջ 607,337,063 ՀՀ դրամ: «Գնումների մասին» ՀՀ օրենքի համաձայն՝ հայտարարվում է մրցույթ, որի արդյունքներով էլ իրականացվում են գծանշումների թարամացման աշխատանքներ: Հաղթող ճանաչված ընկերությունը գծանշումների թարմացումն իրականացնում է այն ներկով, որը պահանջվել է տեխնիկական բնութագրով»:
