«Հրապարակ» թերթը գրում է. «ԲՀԿ նախագահ Գագիկ Ծառուկյանի մամուլի խոսնակ, ԱԺ նախկին պատգամավոր Իվետա Տոնոյանը ԲՀԿ-ի` խորհրդարան չանցնելուց հետո պասիվացել էր, դուրս էր եկել քաղաքական դաշտից։ Նաև չէր իրականացնում Ծառուկյանի մամուլի խոսնակի պարտականությունները, ասում էին` հանգստանում է։ Երեկ տեղեկացանք, որ մի քանի օր է՝ նա վերադարձել է և դարձյալ ստանձնել Ծառուկյանի մամուլի խոսնակի պարտականությունները, «նստավայրն» էլ «կանյաչնիում» է։
Տոնոյանը հաստատեց տեղեկությունը․ «Ի սկզբանե «վերադառնալ» ձևակերպումը մի քիչ սխալ է, որովհետև ընտանեկան հանգամանքներով պայմանավորված՝ միառժամանակ իմ գործառույթները չեմ իրականացրել, հիմա իրականացնում եմ»։ Ընտրություններից հետո լուրեր կային, թե խնդիրներ եք ունեցել Գագիկ Ծառուկյանի հետ, ճի՞շտ է։ Տոնոյանն ասաց․ «Չէ, չէ, բացարձակ որևէ խնդիր չկա, տարբեր տեսակի խոսակցություններ էին կապում «Կենտրոն» հեռուստաընկերության հետ կապված, «Կենտրոնում» ես չեմ աշխատում 2017-ից, երբ դարձել էի պատգամավոր: Որևէ իրական հիմք չունեին այդ խոսակցությունները»։
