Քաղաքական
Եպիսկոպոսաց «կասկածներ» և համազգային կառույցի դեմ «արշավ». ինչն է խնդիրը (ՏԵՍԱՆՅՈՒԹ)
Կաթողիկոսին հանգստի կոչելու պահանջով, 10 եպիսկոպոսի նախաձեռնությամբ, մի խումբ քաղաքացիներ երեկ հավաքվել էին Մայր Աթոռում։ Երեկոյան ժամերգությանն այնտեղ հավաքվել էին նաև կաթողիկոսի կողմնակիցները։
«Հայաստան» խմբակցության պատգամավոր Գեղամ Մանուկյանը, Radar Armenia-ի հետ զրույցում անդրադառնալով կատարվածին, նշեց, որ այն եկեղեցի-պետություն հարաբերությունների մասին չէ։ Ըստ նրա՝ եկեղեցի-պետություն հարաբերությունները կարգավորվել են Հայաստանի սահմանադրությամբ, որն ամրագրում է եկեղեցու դերը և անկախությունը։
Նրա խոսքով՝ սա հայ ազգային եզակի համահայկական կառույցի դեմ արշավ է։
Պատգամավորը, նկարագրելով երեկ Մայր Աթոռում կատարվողը, ընդգծեց, որ փորձ է եղել Վեհափառի քարոզի ժամանակ մտնել եկեղեցի, սակայն հազարավոր մարդկանց շնորհիվ խափանվեց ծրագիրը։
«Հանուն Հանրապետության» կուսակցության նախագահ Արման Բաբաջանյանն էլ Radar Armenia-ի հետ զրույցում նշեց, որ ստեղծված ճգնաժամը հնարավոր կլինի հաղթահարել, եթե խնդիրների բարցրաձայնումը վերապահվի այն հոգևորականներին, որոնք լինելու են այդ խնդիրների հանգուցալուծողները։
«Ի վերջո, եկեղեցականներն են, որ պետք է լուծումներ գտնեն, և դրա համար նաև շատ կարևոր էր, որ այս փուլում եպիսկոպոսներ ունեցանք, որոնք խնդիրների մասին իրենք խոսեցին»,-ասաց Արման Բաբաջանյանը։
Արման Բաբաջանյանի խոսքով՝ եկեղեցի-պետություն դիմակայությունը պիտի դառնա եկեղեցի-եկեղեցի, որպեսզի եպիսկոպոսները դառնան խնդիրները բարձրաձայնող կողմ։
Մանրամասները տեսանյութում։
