Ինչպես և Հայաստանում, այնպես էլ Ադրբեջանում պատկան մարմինները ներգրավված էին անվտանգության ապահովման մեջ։ Այս մասին հայտարարել է «Անվտանգային քաղաքականության հետազոտական կենտրոն» ՀԿ նախագահ Արեգ Քոչինյանը՝ անդրադառնալով Հայաստանի քաղհասարակության ներկայացուցիչների՝ Բաքու կատարած այցին և անվտանգության մտահոգություններին։
Նա նաև նշել է, որ ադրբեջանցի գործընկերները իրենց Երևանում զգացել են անվտանգ, և նույնն իրենց մասով է եղել Բաքվում։
«Այցերը շարունակվելու են»,- ընդգծել է Քոչինյանը։
Նա նաև փոխանցել է Ադրբեջանի նախագահի օգնական Հիքմեթ Հաջիևի ուղերձները Հայաստանի հասարակությանը։
Ըստ Հաջիևի՝ պատերազմն ավարտվել է, հայ-ադրբեջանական կոնֆլիկտն իրենց համար ավարտված է, իրենք ուզում են այս չպատերազմ վիճակից կառուցեն խաղաղություն և գնան դեպի խաղաղություն, իրենք ցանկանում են Հայաստանի հետ համապարփակ և երկարաժամկետ խաղաղություն կառուցել, և Ադրբեջանը Հայաստանի նկատմամբ տարածքային պահանջներ չունի։
