ԱԺ փոխնախագահ Ռուբեն Ռուբինյանը ճեպազրույցի ընթացքում անդրադարձել է անկլավների վերադարձի հարցին:
«Ակնհայտ է, որ սահմանազատման հանձնաժողովում չի կարող սահմանազատվել սահմանից անգամ 1 սմ առանց համապատասխան իրավական հիմքերի՝ Արծվաշենը ևս: Անկլավային հարցերը պետք է որոշվեն սահմանազատման հանձնաժողովների աշխատանքի շրջանակներում»,-ասել է Ռուբեն Ռուբինյանը:
Նրա խոսքով՝ սահմանազատման հանձնաժողովներն ընդունել են աշխատակարգ, որ վավերացվել է ԱԺ-ում, իրենց կողմից՝ իրենց ներպետական ընթացակարգերով. «Ըստ այդ աշխատակարգի ենթադրվում է, որ իրենք պետք է իրավական հիմքերը դնեն, քննարկեն տարբեր հատվածների վերաբերյալ քարտեզագրական հիմքերը, իրականացնեն սահմանազատում, ստորագրեն սահմանազատման պրոտոկոլները»,-նշել է Ռուբինյանը՝ հավելելով, որ ամենավերջում պետք է դելիմիտացիայի վերաբերյալ պայմանագիր կքնքվի:
Ըստ Ռուբինյանի՝ այդ հարցով որոշում մինչև Հայաստանի խորհրդարանական ընտրություններ չեն լինի. «Հաստատ մինչև ընտրությունները չեն լինի, որովհետև երկար աշխատանք է»:
Ըստ ԱԺ փոխնախագահի՝ սահմանազատման գործընթացը հնարավորություն է տալիս տարածքների փոխանակում անելու, բայց եթե տարածքների փոխանակում չի լինում, հանրաքվեի պահանջ չկա, որ պայմանագիրը ստորագրվի ու վավերացվի:
«Եթե որոշվի ինչ-որ տարածքներ փոխանակել, հանրաքվեով է լինելու, սակայն այժմ որևէ նորություն չկա այս հարցում, սահմանազատման հանձնաժողովների հանդիպում չի եղել»,- շեշտել է նա:
