Քաղաքական
Այդ խնդիրը ՀՀ սահմանադրությունը չի պարունակում. Գալյանը՝ Ալիևի հայտարարությունների մասին
ՀՀ արդարադատության նախարար Սրբուհի Գալյանն անդրադարձել է սահմանադրական փոփոխություններին։ Նա նշել է, որ Հայաստանի և շատ երկրների սահմանադրությունների նախաբաններ նման են.
«Մենք խնդիր չենք տեսնում սահմանադրության մեջ և ասում ենք՝ այն, ինչ բարձրաձայնվում է Ադրբեջանի կողմից, խնդիր չէ, ու դրա հավաստումը տվել է ՍԴ-ն՝ միակ մարմինը, որ կարող է նման հավաստում տալ»։
Նա վստահեցրել է՝ սահմանադրությունը նման խնդիր չի պարունակում։
Գալյանը նաև խնդրել է սահմանադրական փոփոխությունների գործընթացը չկապել Ադրբեջանի պահանջի հետ. «Դա չէ իրականությունը»։
Անդրադառնալով հարցին, որ Ադրբեջանի համար սահմանադրության փոփոխությունը խաղաղության համաձայնագիրը ստորագրելու նախապայման է, նա ասել է. «Ամեն դեպքում, խաղաղության պայմանագիրը նախաստորագրվել է, և ինչպես շեշտվել է, խաղաղությունը հաստատվել է։ Իսկ սահմանադրություն փոխելը մեր ներքին գործն է, և որևէ այլ մարդու, վերպետական մարմնի կամ պետության գործը չէ»։
Գալյանը նաև նշել է, որ Սահմանադրական փոփոխությունների նոր նյութերի շարքն արդեն իսկ ուղարկվել է խորհրդի անդամներին։
Հարցին, թե Անկախության հռչակագրին անդրադարձ եղե՞լ է, Գալյանը պատասխանել է․ «Այս անգամ ուղարկված նյութերում և առաջիկա նյութերում չեմ կարծում, որ դա տեղ կգտնի, բայց հենց տեղ գտնի և քննարկվի, առաջին հերթին հանրային տարբերակով իրազեկումները կիրականացվեն։ Դեռ այդ հարցը չի քննարկվել, քննարկվելուն պես հանրությունը և լրագրողական համայնքը կտեղեկացվեն»։
