Քաղաքական

Եթե հրթիռակոծումները շարունակեն, բենզինի գինն ավելի կթանկա. փորձագետ

Եթե հրթիռակոծումները շարունակեն, բենզինի գինն ավելի կթանկա. փորձագետ

Ռուսական նավթավերամշակման գործարանների վրա հարձակումները կարագացնեն գնաճը։ Պատերազմի ուսումնասիրման ինստիտուտի (ISW) վերլուծաբանները նշում են, որ խնդրի մասին արդեն բարձրաձայնել են ռազմական թղթակիցները՝ նշելով ՀՕՊ-ի սարսափելի աշխատանքը և բենզինի թանկացման տեսքով հարվածների հետևանքները, որոնք արդեն սկսել են զգալ քաղաքացիները։

«Թե ի՞նչ է ազդեցություն կունենա Հայաստանի շուկայի վրա, դժվար է ասել, բայց Հայաստանը իր վառելիքը, հիմնականում` բենզինը, ներմուծում է Ռուսաստանից։ Եվ այդ հարձակումները, որոնք իրականացվում են ռուսական վերամշակման գործարանների վրա, բերել է նրան, որ Ռուսաստանի ներսում առաջանում է բենզինի դեֆիցիտ, և ինչպես մեկ անգամ դա արդեն արել են, կարող են կրճատել բենզինի արտահանումը»,-Radar Armenia-ի հետ զրույցում ասաց էներգետիկ ոլորտի փորձագետ Արմեն Մանվելյանը և հավելեց, որ դա ոչ միայն կազդի Հայաստանի, այլև՝ այն բոլոր երկրների վրա, որոնք Ռուսաստանից բենզին են ներկրում, քանի որ Ռուսաստանը խոշորագույն արտահանող պետություններից մեկն է։

Փորձագետի խոսքով՝ բենզին ներկրելու այլընտրանքային ուղի կարող է օգտագործվել այլ երկրներից. «Ժամանակին Հայաստանը բենզին էր ներկրում Բուլղարիայից, և սա ուղղություններից մեկն է, որ կարող են տեսականորեն աշխատացնել։ Տեսականորեն կարելի է բենզին ներկրել նաև Իրանից և Իրաքից»։ Անդրադառնալով թանկացումներին՝ նա ընդգծեց, որ դրանից դժվար կլինի խուսափել, իսկ թե ինչ ռազմավարական պաշարներ կարող է դիտարկել Հայաստանը ներկրման համար, նա շեշտեց, որ ներկրման հնարավորությունները սահմանափակ են․ «Դեֆիցիտը ոչ միայն Ռուսաստանում է, այլև՝ ողջ աշխարհում, քանի որ նավթի վերամշակման տեխնոլոգիա քիչ երկրներ ունեն, և եթե Ռուսաստանը կրճատում է նավթի մշակման իր հզորությունները՝ օբյեկտիվ կամ սուբյեկտիվ պատճառներով, դա բերում է աշխարհում դիզվառելիքի և բենզինի թանկացման»,-ասաց փորձագետը։

Հիշեցնենք, որ այսօր լցակայաններում բենզինի գինը թանկացել է 20-30 դրամով, և Ա. Մանվելյանի համոզմամբ, եթե հարվածները շարունակվեն, բենզինի գինն ավելի կթանկա։ 

Գնահատեք հոդվածը

0 /5
0
գնահատական