«Հայաստանը պատրաստ է կնքել խաղաղության պայմանագիրը». հայտարարել է ՀՀ արդարադատության նախարար Սրբուհի Գալյանը։ Անդրադառնալով Ադրբեջանից հնչող պնդումներին, թե ՀՀ-ն պետք է փոխի սահմանադրությունն ու դիմի ԵԱՀԿ ՄԽ լուծարման համար, որից հետո նոր կստորագրեն փաստաթուղթը, և հարցին՝ ՀՀ-ն պատրա՞ստ է կատարել այդ նախապայմանները, Գալյանն ասել է.
«Այդ հնչեցված մտքերը որպես նախապայման չեմ դիտարկում, և կարծում եմ՝ կառավարությունն էլ չի դիտարկում։ Ես իմ խոսքում նշել եմ, որ խաղաղությունն այլընտրանք չունի, և մեր գործողությունները պետք է միտված լինեն խաղաղության վերջնական հաստատմանը»։
Անդրադառնալով նոր սահմանադրությանը՝ նա ասել է. «Մենք աշխատում ենք սահմանադրության նոր տեքստի վրա, բայց այս պահին տեքստի մասով մանրամասներ ասել չեմ կարող։ Բայց կարևոր է մի շեշտադրում՝ տեքստը չի լինելու գաղտնի և ինչ-որ պահի հանրայնացվելու է»։
Ըստ նրա՝ սահմանադրական փոփոխությունները պարզ առաջադրանք չեն, որ կարելի է կատարել 1-2 ամսվա ընթացքում. «Մասնագետների տևական աշխատանք է պահանջում, խոսքը 8-10 ամսի մասին է, և չեմ կարծում, թե նոր սահմանադրության տեքստը հնարավոր է այդ ժամկետից շուտ պատրաստել»։
