Գյումրիի քաղաքապետի թեկնածու Վարդան Ղուկասյանը՝ անդրադառնալով հարցին, թե արդյոք «Մեր քաղաքը» դաշինքը գլխավորող Մարտուն Գրիգորյանը կմիանա իրեն, հիշեցրել է, որ ինքն ավելի վաղ հայտարարել էր․
«Ես խոստացել էի, որ եթե որևէ ընդդիմադիր թեկնածու ինձնից ավելի շատ ձայն ստանա, պատրաստ եմ առանց ակնկալիքի կանգնել նրա կողքին։ Հուսով եմ, որ Մարտուն Գրիգորյանն էլ իր խոսքի տերն է։ Եթե ինչ-որ բան պակաս է եղել, մենք կարող ենք նստել, բանակցել, քննարկել, խոսել։ Ես ոչ մեկին թշնամու աչքերով չեմ նայում։ Ինչքան էլ վերադաս կառույցները փորձեցին խառնել Գյումրին ու որոշ բաներ կազմակերպել, ես ասել եմ՝ ես թշնամի չունեմ հայ ժողովրդի դեմ»։
Ըստ Ղուկասյանի, Մարտուն Գրիգորյանի հետ որևէ բանակցություն դեռ չի եղել։
Հարցին, թե ինչ կանի, եթե Գրիգորյանը չմիանա իրեն, Ղուկասյանը պատասխանել է․ «Ես պետք է համոզվեմ, որ նա չի միանա իշխանությանը, դրանից հետո նոր մենք անպայման հայտարարություն կանենք՝ ով է նպաստում ՔՊ-ին, ում խոսքը ինչ էր»։
Նա հիշեցրել է, որ ընդդիմադիր թեկնածուների թվում ինքն ամենաշատ ձայներն է հավաքել․ «Չգիտեմ մի դեպք աշխարհում, երբ նրանք, ովքեր շատ ձայն են ստացել, գնան ու միանան ավելի քիչ ձայներ հավաքածին։ Կարեն Սիմոնյանը և Ռուբեն Մխիթարյանը միացել են ինձ, երեքս միասին միացել ենք, սպասում ենք նաև Մարտուն Գրիգորյանին։ Նա ավագանիում ունի 6 անդամ, սպասում ենք նրա որոշմանը»։
Հարցին, թե հնարավո՞ր է՝ քաղաքապետի պաշտոնը ՔՊ-ին չզիջելու համար ինքը միանա Գրիգորյանին, Ղուկասյանը պատասխանել է․ «Երբ գա նման իրավիճակ, կտեսնեք՝ ինչ կարող եմ անել»։
Իսկ քաղաքապետարանի պաշտոնները ընդդիմադիր այլ ուժերին տրամադրելու վերաբերյալ հարցին ի պատասխան նշել է․ «Փոխքաղաքապետի պաշտոնը՝ ոչ, բայց մնացած պաշտոնները, որոնք անհրաժեշտ կլինեն, պատրաստ ենք տրամադրելու»։
Նա նաև վստահեցրել է, որ իշխանությունների հետ որևէ պայմանավորվածության չի գնա. «Ես երբեք իրենց հետ պայմանավորվածություն ձեռք չեմ բերի»։ Ըստ Ղուկասյանի՝ իր պաշտոնավարման շրջանին առնչվող քրեական գործերի վաղեմության ժամկետները լրացել են. «Ինչ ուզում է անեն՝ կանգնած տեղը թեկուզ շառով էլ տան, իրենց հետ ճանապարհ չունեմ գնալու։ ՔՊ-ի հետ ճանապարհ չեմ գնալու, վերջ»։
Նա նաև վստահեցրել է, որ իր ավագանու անդամներից ոչ մեկն էլ չի գնա իշխանությունների հետ գործարքի. «Երբեք չեմ հավատա, որ ինձանից որևէ մեկը դավաճանի և դավաճանի անուն ձեռք բերի»։
