Տարածաշրջանում պատերազմի կամ էսկալացիայի ո՛չ պատճառ, ո՛չ նախադրյալ, ո՛չ հիմնավորում գոյություն չունի։ Իմ գնահատականը միանշանակ է, հայտարարել է ՀՀ վարչապետ Նիկոլ Փաշինյանը։
Խոսելով Խաղաղության պայմանագրի չհամաձայնեցված հոդվածների մասին՝ վարչապետը նշել է, որ դրանցից մեկը վերաբերում է սահմանի երկայնքով երրորդ ուժերի տեղակայմանը, մյուսը՝ միջազգային ատյաններում իրավական և այլ դիվանագիտական վեճերին, վիճաբանություններին և այլն։
«Խաղաղության պայմանագրի նախագծում ձեր նշած հարցերի վերաբերյալ անդրադարձ չկա։ Չհամաձայնեցված երկու կետերը շարունակում են մնալ նույն չհամաձայնեցված երկու կետերը․ քանի դեռ գնում է քննարկումը, այսինքն՝ քանի դեռ համաձայնեցված չեն, ուրեմն համաձայնեցված չեն։ Կան շերտեր, նյուանսներ, այս դեպքում ասել՝ մերժել է, չի մերժել, ընդունել է, չի ընդունել, մի քիչ հարաբերական է»,- նշել է նա։
Հարցին, թե սահմանազատված հատվածներից դիտորդներին հանելու առաջարկն Ադրբեջանի համար ընդունելի՞ է, Փաշինյանը պատասխանել է, որ այս պահին այդ հարցով չի հաջողվել համաձայնություն արձանագրել։
