Քաղաքական
«Մեր խնդիրն է՝ մինչև ընտրություններ ունենալ նոր սահմանադրության տեքստ». Գալյան
ՀՀ արդարադատության նախարար Սրբուհի Գալյանն անդրադարձել է սահմանադրական փոփոխությունների գործընթացին․
«Մեր խնդիրն է՝ մինչև ընտրություններ ունենալ նոր սահմանադրության տեքստ, և մեր աշխատանքները պետք է տանենք հենց այդ ուղղությամբ»,- ասել է նա լրագրողների հետ ճեպազրույցում։
Նախարարն անտեղի է որակել հայտարարությունը, թե նոր սահմանադրություն գրվում է այլ երկրի՝ Ադրբեջանի հայտարարությունների հիման վրա.
«Ոչ ուղղակի, ոչ անուղղակի կապ սահմանադրության նոր տեքստի և այլ երկրների հայտարարությունների հետ չկա և չի կարող լինել»,- ասել է նա։
Ըստ նախարարի՝ գործող սահմանադրության տեքստը խաղաղության գործընթացի իրականացման հետ կապված որևէ խոչընդոտ չի պարունակում, և այդ մասին ասել է նաև ՍԴ-ն։
Գալյանը նաև նշել է, որ նոր սահմանադրություն ունենալու հետ կապված հարցը սկսել է քննարկվել 2018թ. հեղափոխությունից հետո․
«Այդ աշխատանքներն ուղղակի ինչ-ինչ պատճառով չեն հանգել տրամաբանական վերջնարդյունքին։ Եւ ես, որպես նոր նախարար, կարծում եմ, որ պետք է ստանձնեմ պարտականություն և պատասխանատվություն՝ ի վերջո մշակել նոր սահմանադրության նախագիծ, որին հավանություն տալու կամ չտալու որոշումը ժողովրդինն է, որովհետև նոր սահմանադրություն կարող է ընդունվել միայն հանրաքվեով»,- ասել է նա։
