ՀՀ ԱԳ նախարար Արարատ Միրզոյանը հայտարարել է, թե սահմանային էսկալացիան կանխելու համար է, որ եվրոպական դիտորդները հանրապետության սահմաններին են։
Նա նաև հիշեցրել է, թե ինչի համար է ԵՄ քաղաքացիական առաքելությունը. «Չդարձնենք այդ առաքելությունը ռուս սահմանապահ զորքերի երկրորդ սերիան, երբ ինչ-որ երրորդ երկիր՝ հզոր ուժի ներկայացուցիչ, անպայման պետք է լինի մեր սահմանին։ Ինչպես ռուս սահմանապահներն էին տեղակայվել ժամանակավոր, որպեսզի մենք կարողանանք կարողություններ ձևավորել կամ մեր մտավախությունները չեզոքացնել X երկրի հետ, այդպես էլ այս դեպքում մենք հրավիրել ենք ԵՄ դիտորդներին, որպեսզի դիտարկեն, կանխեն։ Նաև իրենց մանդատում է նշված՝ աջակցել սահմանազատման գործընթացին։ Եթե սահմանը զատված է, եթե խաղաղության պայմանագիր է կնքվում, հարաբերություններ են հաստատվում, պետք է շնորհակալություն հայտնել ու ասել, թե ինչով կարող ենք մենք էլ ձեզ օգնել աշխարհի որևէ անկյունում։ Բայց այս պահին մենք չունենք այդ մտադրությունը»։
