ՀՀԿ փոխնախագահ Արմեն Աշոտյանն այսօր դատական նիստում հայտարարել է, որ իրենց պաշտպանական կողմը ներկայացնելու է քաղաքական գործունեության հետ կապված միջնորդություններ․ «Ամեն նիստին գալու, այստեղ ներկայացնելու ենք քաղաքական գործունեության հետ կապված միջնորդություն, որ դատարանն իր քննության և որոշումների արդյունքում իր տեսակետը ներկայացնի ու փարատի այն կասկածները, թե ամբողջ երկու տարվա ընթացքում իմ նկատմամբ իրականացված գործողությունները 100՞, թե՞ 70%–ով են քաղաքական հետապնդում»,- նշել է նա։
Աշոտյանի փաստաբանները միջնորդել են, որ ՀՀԿ փոխնախագահին թույլատրվի տնային կալանքի մեջ գտնվելով՝ հանդիպել ԳՄ անդամներին, այդ թվում՝ նախկին նախագահ Սերժ Սարգսյանին։ Մեղադրող դատախազ Արման Նշանյանը հայտարարել է, որ միջնորդությունը պետք է մերժվի։
Աշոտյանն արձագանքել է, որ իրեն արդեն թույլատրվել է հանդիպել պատգամավորների հետ. «Էն մի խմբակցությունը՝ ամենամեծը, մեր տանը որևէ տեղ չունի, և ո՛չ իրենք ինձ այցելելու ցանկություն ունեն, ո՛չ էլ ես՝ հյուրընկալելու։ Այսինքն՝ Դուք թույլատրել եք 105 հոգու հետ հանդիպել, 69-ը, մի քանի հոգի կուսակցությունից դուրս եկածները ցանկալի չեն ու չեն գալու, այսինքն, 70 հոգու քվոտա ունեմ՝ չգրված քվոտա։ Ունեմ որոշակի հնարավորություն՝ լրացնելու։ Դրա փոխարեն ուզում եմ 12 հոգու հետ շփվել»,- ասաց նա։
Նիստը նախագահող դատավոր Վահե Դոլմազյանը որոշեց մերժել միջնորդությունը։
