Քաղաքական
«Աղազարյանը պետանվտանգությանն առնչվող տեղեկությունների արտահոսքեր է կազմակերպել». Կոնջորյան
ԱԺ ՔՊ խմբակցության ղեկավար Հայկ Կոնջորյանն անդրադարձել է Հովիկ Աղազարյանին կուսակցությունից հեռացնելուն։
«Պարզվել է, որ Հովիկ Աղազարյանը խմբակցության նիստերից, այլ ներքին քննարկումներից, այդ թվում՝ պետական անվտանգությանը վերաբերվող թեմաներով, որ ենթակա չէին հրապարակվելու, տարբեր դրվագներով նման բնույթի տեղեկատվություն, նաև՝ կուսակցական, քաղաքական ներքին բնույթի տեղեկությունների արտահոսքեր է կազմակերպել։ Դրանք պարզվել են և հանդիսացել նրան հեռացնելու հիմքերից մեկը»,- ասել է Կոնջորյանը։
Թե ինչ տեղեկություններ է նա հրապարակել, Կոնջորյանը չի մանրամասնել, օրինակներ չի նշել՝ ասելով, թե տեղեկությունները գաղտնագրված են։ «Վարչության նիստի ժամանակ ինքը չի հերքել այդ ամենը»,- ասել է նա՝ հավելելով, որ խոսքը հարցազրույցների մասին չէ. «Փակ քննարկման ժամանակ հնչած տեղեկատվությունը, որ վերաբերում է ոչ թե ներքաղաքական, այլ նաև Ազգային անվտանգության այլ հարցերի, ըստ էության, արտահոսք է կազմակերպել»։
Թե ինչո՞ւ Աղազարյանի հետ կապված այս դրվագները բացահայտվեցին վարչապետի՝ մանդատը վայր դնելու խնդրանքը չկատարելուց հետո, նա նշել է. «Տարբեր գործերով կային հարուցված վարույթներ, որտեղ Աղազարյանի անունն այս կամ այնկերպ շոշափվում էր։ Երբ գործողություններ են կատարվել վարույթների շրջանակներում, դուրս են եկել այլ ինֆորմացիաների վրա»։
Ըստ Կոնջորյանի՝ Աղազարյանին որևէ մեկը չի ճնշել, այլապես՝ նա վայր կդներ մանդատը։
