Ես երբեք չեմ մտածել, որ մեկ դատական նիստի ժամանակ կարելի է օրենքի այսքան խախտումներ թույլ տալ, ուղղակի սա մի խայտառակություն էր,- հայտարարել է ՀՀ երկրորդ նախագահ Ռոբերտ Քոչարյանը՝ դատական նիստից հետո ճեպազրույցի ժամանակ։ Նրա խոսքով, տեղի ունեցածն իրավաբանության խոշտանգում էր։
Անդրադառնալով նոր առաջադրված մեղադրանքին, ԶՈՒ ներգրավմանը, նա նշեց. «Դուք էդ հեքիաթը լսե՞լ եք։ Ես ականջակալները միացրել էի, որ էդ անհեթեթությունը չլսեմ։ Չեմ լսել, չեմ ուզում իրավական հարցերի մեջ խորանալ»։ Նա նշեց, որ արտակարգ դրության մասին հրամանագիրն ապօրինի չի եղել, այլ՝ հաստատվել է ԱԺ-ի կողմից։
Քոչարյանը հստակ չի պատասխանել ԼՂ-ից զորք բերելու մասին հարցին, նշելով, որ COVID-19-ի համավարակի ժամանակ, երբ արտակարգ դրություն էր հայտարարվել, ՊՆ Ռազմական ոստիկանությունը ներգրավվել է այդ ամենին։
Քոչարյանը հերքել է զինծառայողների կողմից կրակելը, փոխարենը ցուցարարներին մեղադրել ինքնաձիգերից կրակոցներ արձակելու մեջ. «Բազմաթիվ տեսահոլովակներ են պտտվում, թե ոնց են ցուցարարների միջից նաև ավտոմատով կրակում դեպի ոստիկանական շարքերը»։
Եթե զինծառայողները չեն կրակել, ինչո՞ւ էին փոխում պարկուճները հարցին նա նշել է. «Ինձ հայտնի չէ այդ փաստը։ Պարկուճների փոխելն ընդհանրապես միֆոլոգիայի ժանրից է։ Եւ ինչ ասաց, ասաց հունիս-հուլիս ամսի մասին։ Ես ապրիլի 9-ից պաշտոնի չեմ եղել, բացարձակապես տեղյակ չեմ, թե ինչի մասին է խոսքը»։
«Չերյոմուխա-7» կիրառելու մասին հարցին Քոչարյանն ասել է, թե այդ հարցը պետք է տալ ոստիկանությանը. «Ես ծանոթ չեմ կանոնակարգերին, պարտավոր էլ չեմ ծանոթանալ։ Արտակարգ դրությունը մտցվել է, երբ ունեցել ենք մոտ 20 վիրավոր ոստիկանական զորքերից»։ Քոչարյանն ասել է, թե տեղյակ չէ նաև օլիգարխների թիկնապահներին զրահաբաճկոններ տրամադրելու հարցին։
Նա ասել է, թե արտակարգ դրություն մտցվել է հիմնավորված ու բխել է իրավիճակից. «Հակառակը, եթե արտակարգ դրություն չմտցնեի, այսօր պետք է դատ անեին նախագահի անգործության հետ կապված»։
