Քաղաքական
«Բաստուրմային ու սուջուխին ավելի մեծ ուշադրություն ենք հրավիրում, քան օրհներգին». վարչապետ
ԿԳՄՍ նախարարությունը մի խումբ պատգամավորների առաջարկով Կառավարության քննարկմանը ներկայացրեց նախագիծ, որով առաջարկվում է կարգավորել ՀՀ օրհներգի, ինչպես նաև օրհներգի կատարման հետ կապված որոշ հարաբերություններ։
Նախագծով, մասնավորապես, առաջարկվում է սահմանել ՀՀ օրհներգի 1 պաշտոնական տարբերակ ՀՀ-ում և միջազգային հարթակներում պաշտոնական և ներկայացուցչական տարաբնույթ միջոցառումների և օրենքով սահմանված այլ դեպքերի համար։ Նաև առաջարկվում է փոփոխել քառատողերի հաջորդականությունը։
Վարչապետ Նիկոլ Փաշինյանը նշել է, թե որևէ ոլորտում, երբ մենք փոփոխություններ են արվում ու չեն հասնում ԴՆԹ մակարդակի, դրանք տևական և ամբողջական չեն կարող լինել։ Նա կարևորել է ստանդարտները. «Որևէ միջոցառման կազմակերպման ընթացքում ջրին, գինուն, բաստուրմային, սուջուխին ավելի մեծ նշանակություն ու ուշադրություն ենք հրավիրում, քան օրհներգին»,- ասել է նա՝ հավելելով, որ համացանցում օրհներգի իրարից տարբեր բազմաթիվ կատարումներ կան. «Որևէ մեկը իրեն հարց չի տվել՝ բա ի՞նչ օրհներգ է հնչելու, ինչպես է հնչելու։ Սա մի ֆունդամենտալ խնդիր է»։ Վարչապետը նշել է, որ իր մասնակցությամբ միջոցառումներին տևական ժամանակ է՝ հանձնարարական է տվել, թե ինչ ստանդարտներով պետք է հնչի օրհներգը. «Պետական արարողակարգային միջոցառումների ժամանակ բավական երկար ժամանակ հենց այս տարբերակն է հնչում, ինչը կարող է մեկնաբանվել օրենքի որոշակի խախտում, բայց մենք ցանկացանք պրակտիկայում տեսնել, թե այդ տարբերակն ինչպես է հնչում ու ինչ ընկալման է արժանանում հանրության մոտ, և տեսանք, որ այդ մոտեցումը դրական է»։
