Քաղաքական
Հրայր Թովմասյանը մեղավոր ճանաչվեց, բայց քրեական պատասխանատվությունից ազատվեց
Առաջին ատյանի դատարանը հրապարակեց ՀՀ Սահմանադրական դատարանի նախկին նախագահ, ՍԴ անդամ Հրայր Թովմասյանի գործով դատավճիռը։
Դատարանը Հրայր Թովմասյանին մեղավոր ճանաչեց 2 դրվագով, սակայն նա ազատվեց քրեական պատասխանատվությունից` գործի վաղեմության ժամկետն անցած լինելու պատճառաբանությամբ։
Տուժող և քաղաքացիական հայցվոր Սարգսյանի քաղաքացիական հայցը բավարվեց և Հրայր Թովմասյանից հօգուտ տուժողի կբռնագանձվի 5 մլն 600 հազար դրամ՝ որպես հանցագործության հետևանքով պատճառված վնասի փոխհատուցում։ Տուժող և քաղաքացիական հայցվոր Էմմա Շաբոոյանի քաղաքացիական հայցը բավարարվեց մասնակի, հօգուտ նրա կբռնագանձվի 5 մլն 203 հազար դրամ։
Հրայր Թովմասյանի գույքի վրա դրված կալանքը՝ 10 մլն 803 հազար գումարի չափով, մնաց անփոփոխ, մինչև դատավճռի կատարումը, իսկ մնացած մասով վերացվեց։
Հիշեցնենք, որ Հրայր Թովմասյանը մեղադրվում է Արդարադատության նախարար եղած ժամանակ պաշտոնեական լիազորությունները չարաշահելու մեջ՝ երկու դրվագով։ Ըստ Դատախազության՝ Թովմասյանը Արդարադատության նախարարության վերահսկողության ներքո գործող նոտարներին ստիպել է Բաղրամյան 1 հասցեում գտնվող և իրեն պատկանող տարածքները շուկայականից բարձր գնով վարձակալության վերցնել, ինչպես նաև նոտարական գրասենյակի համար շուկայականից բարձր գնով վարձակալության է տվել Սախարովի հրապարակին հարակից տարածքում գտնվող և իրեն պատկանող այլ տարածքները։
Նշենք, որ քրեական գործը դատավոր Տաթևիկ Գրիգորյանի վարույթում է գտնվում շուրջ 4․5 տարի։
Թովմասյանը լրագրողների հետ զրույցում նշեց, որ բողոքարկելու են որոշումը և՛ վերաքննիչ, և՛ վճռաբեկ դատարան։
