Քաղաքական
«Հայտարարություններն Իրանը մեր սիրուն աչքերի համար չի անում». Իշխան Սաղաթելյան
ԱԺ «Հայաստան» խմբակցության պատգամավոր, ՀՅԴ ԳՄ ներկայացուցիչ Իշխան Սաղաթելյանը կարևորել է Իրանի կտրուկ և հստակ դիրքորոշումը ՀՀ տարածքային ամբողջականության և «Զանգեզուրի միջանցքի» հետ կապված․
«Իրանը մեր ռազմավարական բարեկամ երկիրն է, որ Հայաստանի տարածքային ամբողջականությամբ շահագրգռված է, և այն հայտարարությունները, որ հնչեցվում են Թեհրանի կողմից, ծամծմված չեն, երկիմաստ չեն, այլ՝ շատ հստակ, և այս իմաստով ամբողջությամբ գնահատելի է մեր հարևանի դիրքորոշումը»։
Ըստ Սաղաթելյանի՝ այն, որ ՀՀ-ից չկան կտրուկ և հստակ դիրքորոշումներ, մտահոգիչ է։ Իսկ թե ինչն է անհանգստացնում Իրանին, Սաղաթելյանը մեկնաբանել է. «Պանթուրքական ծրագիրը, միջանցքը, այդ ամենի դիմացն առնելը, որովհետև այստեղ լրջորեն վնասվում են Իրանի շահերը։ Ինչ արվում է, պարզապես մեր սիրուն աչքերի և հայասիրության համար չի արվում․ երկու երկրներն այս հարցում ունեն ռազմավարական շահեր»։
