«Վերջին շրջանում թուրքական կողմը խոսում էր ավելի շուտ ուղիղ հանդիպումների մասին՝ կամ Հայաստանի, կամ Թուրքիայի տարածքում։ Փաստորեն մենք տեսնում ենք, որ հանդիպումը տեղի է ունենալու սկզբում Հայաստանի, կեսօրին՝ Թուրքիայի տարածքում։ Եվ այստեղ հայկական կողմը կրկին զիջում կամ ընդառաջ քայլ է կատարում դեպի թուրքական առաջարկին». Radar Armenia-ի հետ զրույցում ասաց թուրքագետ Նելլի Մինասյանն՝ անդրադառնալով վաղը Հայաստան-Թուրքիա սահմանին տեղի ունենալիք հատուկ ներկայացուցիչների 5-րդ հանդիպմանը։
Մինասյանն առանձնապես մեծ սպասելիքներ չունի վաղը կայանալքի հանդիպումից։ Ըստ նրա, ամենայն հավանականությամբ կրկին խոսքը կգնա երկու պայմանավորվածությունների (սահմանը բացել երրորդ երկրների քաղաքացիների համար, և դիվանագիտական անձնագրեր ունեցողների համար) կատարման վերաբերյալ. «Ավելի շատ կրկին իմիտացիայի պրոցես է, որը նկատելի էր Թուրքիայի վարքագծում վերջին տարիների ընթացքում, և ավելի շուտ կարելի է ասել այս քաղաքականության շարունակությանը պետք է սպասել, որը մեծ հաշվով չի ենթադրում հարաբերությունների կարգավորում։ Եթե անգամ բովանդակային պայմանավորվածություններ ձեռք բերեն՝ օրինակ երրորդ երկրների քաղաքացիներ համար սահմանը բացել, ուրեմն այստեղ էության մեջ հայ-թուրքական հարաբերությունները չեն կարգավորվում, այլ փոքր քայլի մասին է խոսքը»։
Թուրքագետը Թուրքիայի կողմից ավելի շատ իմիատացիա է տեսնում, քան հարաբերությունների կարգավորմանը նպատակաուղված քայլ. «Հազիվ թե այս քայլը նպաստի հայ-թուրքական հարաբերությունների կարգավորմանը։ Մենք կարող ենք առավելագույնը սպասել ձեռք բերված պայմանավորվածությունների հետ կապված բովանդակային ինչ-որ քայլ։ Բայց անգամ սրան վերապահումով կմոտենամ։ Տեսականորեն հայ-թուրթական հարաբերությունների բարելավումը կազդի հայ-ադրբեջանական հարաբերությունների վրա, բայց մենք տեսնում ենք հակառակ գործընթացը, երբ Թուրքիան հայ-թուրքական հարաբերությունները պայմանավորում է հայ-ադրբեջանական հարաբերություններով։ Այնպես, որ այս հարթակում ևս քաղաքական առումով փաստացի սպասելիքներ չպետք է ունենանք»։
Հայկ Մագոյան
