Շրջակա միջավայրի նախարարությունը ներկայացրել է անցնող աշխատանքային շաբաթը Շրջակա միջավայրի նախարարության կառույցներում։
««Հիդրոօդերևութաբանության և մոնիթորինգի կենտրոն»-ում
ՊՈԱԿ-ի լաբորատորիան հավատարմագրվել է ԳՕՍՏ ԻՍՕ/ԻԷԿ 17025-2019 ստանդարտի պահանջների համաձայն։
«Զանգեզուր» կենսոլորտային համալիրում
ԳԱԱ Թախտաջյանի անվան բուսաբանության ինստիտուտի գիտաշխատողները համալիրի պահպանվող տարածքներում իրականացրել են հետազոտական գիտարշավ՝ քարաքոսաբանական և անտառագիտական ուղղություններով։
ԳԱԱ կենդանաբանության և հիդրոէկոլոգիայի գիտական կենտրոնի գիտաշխատողները «Արևիք» ազգային պարկում իրականացրել են միջատների հետազոտություններ և մոնիթորինգ։
ՊՈԱԿ-ի և «Արահետներ փոփոխության համար» ՀԿ-ի համագործակցության շրջանակում համատեղ շրջայց է իրականացվել «Արևիք» ազգային պարկում՝ «Արևիք»-ի զբոսաշրջային հիմնական ուղղություններ հանդիսացող Սրտեր և Լիճքի ջրվեժներ տանող արահետների կահավորման համար անհրաժեշտ գործողությունների մշակման նպատակով։
«Սևան» ազգային պարկում
Անցկացվել է «Sevan Startup Summit» ամենամյա վրանային բիզնես ֆորումը։ Այս կապակցությամբ բազմաթիվ են եղել ՊՈԱԿ-ի, Սամիթի, այլ գերատեսչությունների ներկայացուցիչների հանդիպումները։
Այցելուների կենտրոնում էկոկրթական միջոցառումներ են անցկացվել։
Արգելոցապարկային համալիրում
ՊՈԱԿ-ի, Հայաստանի Կովկասի հիմնադրամի և Ա. Թախտաջյանի անվան բուսաբանության ինստիտուտի համագործակցությամբ «Էրեբունի» պետական արգելոցում իրականացվել է գիտարշավ, որի արդյունքում կատարվել է ֆլորայի ուսումնասիրություն և տեղադրվել են փորձահրապարակներ: Համագործակցությունը կրելու է շարունակական բնույթ:
Հայաստանի բնության պետական թանգարանում
Հյուրընկալվել են Ֆրանսիայից ժամանած գիտնականներ: Թանգարանում էքսկուրսիայի ընթացքում նրանց ներկայացվել են Հայաստանի կենսաբազմազանության առանձնահատկությունները, բուսական և կենդանական աշխարհը: Մասնավորեցվել է ցորենը, որի չորս տեսակներից երեքն աճում է Հայաստանում:
Էկոկրթական միջոցառումներ են կազմակերպվել Հայաստանի բնությանը ծանոթանալու եկած դպրոցահասակների համար։
«Խոսրովի անտառ» պետական արգելոցում
Թանգարանում էկոկրթական ծրագիր է կազմակերպվել Գոռավանի «Գոռ» մանկապարտեզի սաների համար»,-նշված է հաղորդագրության մեջ։
