ՆԳ նախարար Վահե Ղազարյանը հայտարարել է, թե 2023թ. համեմատ այս տարի նվազել է և ՃՏՊ-ների, և զոհերի ու վիրավորների թիվը։ Ըստ նրա, այս տարի արձանագրվել է վերջին տասը տարվա մեջ ամենալավ ցուցանիշը․
«Իհարկե, ես համամիտ եմ, որ այսօրվա վարորդները չունեն քշելու տակտ։ Վերջին դեպքը, որ եղավ մի քանի օր առաջ, չորս հոգի մահացան Երևան-Սևան մայրուղում։ Նման դեպք ես չէի տեսել, անկեղծ ասեմ։ Հանդիպակաց գոտուց թռել էր մյուս գոտի, և մեքենան կես էր եղել։ Ահավոր էր։ Իհարկե, կապված էր արագության հետ։ Ունեցանք զոհեր։ Բայց հիմա, ամենակարևորը, որ շատ հետաքրքիր ծրագիր ունենք, որ հավանության է արժանացել կառավարությունում, ունենք տեսալուսանկարահանող էլեկտրոնային համակարգ, որով մեծ աշխատանքներ են կատարվում»։
Ըստ նախարարի, նաև ճանապարհների որակից է կախված ՃՏՊ-ների թիվը. «Այսինքն, փոսեր չկան, մարդիկ գազ են տալիս, ի՞նչ ասեմ։ Շատ ենք վերլուծել, շատ»։
Նախարարը նաև նշել է, որ 2023թ. կտրուկ ավելացել է ՀՀ ներմուծված մեքենաների թիվը․ բացի այդ, միայն ԼՂ-ից Հայաստան է մտել 20.000 մեքենա։
