Քաղաքական
«Ռուսական հեռուստաալիքների հարցով Մոսկվայում կոնսուլտացիաներ են ընթանալու». նախարար
«Առաջիկայում Մոսկվայում ընթանալու են խորհրդակցություններ, կոնսուլտացիաներ, ինչպես ենթադրում է երկկողմ միջպետական համաձայնագիրը, որի ընթացքում հայկական կողմը ներկայացնելու է լուծումների վերաբերյալ իր առաջարկները». լրագրողների հետ ճեպազրույցում ասել է Բարձր տեխնոլոգիական արդյունաբերության նախարար Մխիթար Հայրապետյանը՝ պատասխանելով հարցին, թե ինչպես է կարգավորվելու ռուսական հեռուստաալիքների հարցը
Հայրապետյանի խոսքով՝ լուծումները բխում են ինչպես համաձայնագրի ողջ տրամաբանությունից, այնպես էլ Հայաստանի պետական շահերից․ «Այն է՝ ապահովել համապատասխան բովանդակությամբ հեռուստակոնտենտ, որը որևէ պարագայում չի ենթադրի ՀՀ ներքին գործերին միջամտություն, վիրավորանք ՀՀ պետական խորհրդանիշերին, առհասարակ, պետության, ինչպես նաև Հայաստանի ժողովրդի հույզերի և արժանապատվության նկատմամբ»։
ԲՏԱ նախարարին հիշեցրել են հարցի վերաբերյալ Մոսկվայի և Երևանի նախորդ քննարկումը, որի առնչությամբ Մոսկվայից հայտարարել էին, թե կոնկրետ օրինակներ չեն ներկայացվել։
Մխիթար Հայրապետյանն ասաց, որ համաձայնագրում տեղ գտած գործիքները, որոնք ներդրվել են իբրև նման հաղորդումների վերահսկողություն կամ կանխարգելում, չեն աշխատում․ «Սա հաշվի առնելով՝ հայկական կողմը ձևակերպել է իր պատկերացումները լուծումների վերաբերյալ։ Սա հաշվի ենք առնելու և ռուս գործընկերներին որպես փաստարկ ներկայացնելու ենք»։
Նախարարը նաև հայտնեց, որ հստակ որոշված օր կա քննարկումների համար, բայց հրաժարվեց հրապարակել ամսաթիվը։
