Էկոնոմիկայի նախկին նախարար Վահան Քերոբյանը դատարանում, մինչև իր խափանման միջոցի վերաբերյալ որոշման հրապարակումը, շփվել է լրագրողների հետ։ Նա հրաժարվել է պատասխանել քրեական գործի մանրամասների մասին հարցերին՝ նշելով, թե նախաքննություն է ընթանում։
«Նոր նախարար նշանակե՞լ են»,–լրագրողներին հարցրել է նա։
- Այս պահին միայն դա՞ է մտահոգում։
-Այո։
- Արժանի փոխարինող տեսնու՞մ եք։
- Այո, իհարկե։
- Տեղակալների՞ց։
- Անփոխարինելի մարդ չկա, չէ՞։
- Գևորգ Պապոյանի թեկնածությունն են քննարկում․ ի՞նչ կարծիք ունեք նրա մասին։
- Շատ լավ։
- Իսկ Թունյանի՞ մասին։
- Էլի շատ լավ։
Նախկին նախարարը նշել է, թե իր դեմ հարուցված գործը քաղաքական չի համարում։
- Դուք յուրային չէի՞ք համարվում։
- ՔՊ-ում բազմաթիվ ընկերներ ունեմ։
- Իսկ Մհեր Գրիգորյանի հետ Ձեր հարաբերությունները ո՞նց են։
- Աշխատանքային։
- Լա՞վ, թե՞ վատ։
- Աշխատանքային։
- Դրակա՞ն, թե՞ բացասական։
- Թե դրական, թե բացասական։
- Ըստ Ձեզ՝ նա կուզե՞ր, որ Դուք աշխատանքից ազատվեիք։
- Իրենից հարցրեք։
- Ձեր ազատման մասին Նիկոլ Փաշինյա՞նն է ասել, որ ազատված եք, տեղեկացրե՞լ է, թե՞ հորդորել՝ դիմում գրել․ ո՞նց է եղել։
- Առաջարկել են դիմում գրել։
- Ո՞վ է առաջարկել, Արայիկ Հարությունյա՞նը։
- Այո։
- Իսկ Փաշինյանի հետ խոսե՞լ եք։
- Նամակով շնորհակալություն եմ հայտնել համատեղ աշխատանքի համար, ինքը՝ նույնպես։
- Ու էլ շփում չի՞ եղել։
- Ոչ։
- Իսկ աշխատանքից ազատվելու առաջարկի հիմքում ի՞նչն է եղել։
- Գիտեք՝ էն պահն ա, որ եթե ուրախ չեն իմ աշխատանքի համար, մի վայրկյան ավել չեմ մնա։ Ասել են՝ առաջարկում ենք, որոշվել է ազատման հարցը, այդպես է եղել։
