ԱԺ ՔՊ խմբակցության ղեկավար Հայկ Կոնջորյանը հայտարարել է, թե սահմանադրությունը փոխելը բացարձակապես Ադրբեջանի պահանջը չէ․
«Սա Հայաստանի ներքին օրակարգն է, սա Հայաստան պետության մասին է, ՀՀ քաղաքացիների մասին է»,- ասել է նա լրագրողների հետ ճեպազրույցում։
Ըստ Կոնջորյանի՝ հիշատակելով Ադրբեջանի հայտարարությունները՝ թելում ենք նրանց ասեղը։
Կոնջորյանը նաև հավելել է. «Սահմանադրության, անկախության հռչակագրի ու 4-րդ հանրապետության մասին քննարկումները, որ ընթանում են ու կընթանան, մեր ինքնահայեցման մասին են»։
Կոնջորյանը ասել է նաև, թե վաղաժամ է վերջնական եզրակացություններ անել, քանի դեռ չի ներկայացվել սահմանադրության նախագիծը. «Հիմա թե՛ մենք, թե՛ ընդդիմությունը, թե՛ հանրությունը կներկայացնենք դիրքորոշումները, հետո, երբ կլինի նախագծի տեքստ, բոլորը կիմանան դրա մասին․ հիմա վաղաժամ է վերջանական եզրահանգումներ անելը»։
