Քաղաքական
«Սա, առաջին հերթին, ներքին նշանակություն ունեցող փաստաթուղթ է». ԱԳ նախարարը՝ սահմանադրության մասին
Հայաստանի ԱԳ նախարար Արարատ Միրզոյանն անդրադարձել է նոր սահմանադրություն ընդունելու անհրաժեշտության մասին վարչապետ Նիկոլ Փաշինյանի հայտարարություններին։ Նրա խոսքով՝ սահմանադրական փոփոխությունների մասին իշխանությունը խոսել է դեռևս 2018-ի հեղափոխությունից կարճ ժամանակ անց․
«Իմ ընկալմամբ՝ սա մի փաստաթուղթ է, որը, բացի կոնկրետ իրավահարաբերություններ ֆիքսելուց և մեխանիզմներ ամրագրելուց, առաջին հերթին փիլիսոփայական հենք է (իզուր չեն ասում՝ մայր օրենք), որով կառուցվում են հասարակության ներսում իրավահարաբերությունները, քաղաքացի-քաղաքացի, քաղաքացի-պետություն այլն։
Սա, առաջին հերթին, ներքին նշանակություն ունեցող փաստաթուղթ է։ Չեմ ուզում ամբողջովին մերժել, որ, ներքին նշանակություն ունենալով հանդերձ, այն, ինչպես ցանկացած սահմանադրություն, ավելի լայն ազդեցություն ունի․ այսինքն, անդրադառնում է արտաքին հարաբերությունների վրա։ Այս առումով, մեր սահմանադրությունը ևս բացառություն չէ։
Այն, որ Հայաստան-Ադրբեջան հարաբերությունների կարգավորման գործընթացն է սահմանադրության փոփոխության պատճառը, մեծ չափազանցություն է, որի հետ համաձայն չեմ»,- ասել է Միրզոյանը։
Հարցին՝ գործող սահմանադրությո՞ւնն է արգելակում խաղաղության գործընթացին, նախարարը պատասխանել է. «Ամենևին ոչ»։
