Քաղաքական
«Որևէ մեկի հայտարարությամբ ԼՂՀ–ն չի կարող լուծարվել». Սերժ Սարգսյան
Հայաստանի նախկին նախագահ Սերժ Սարգսյանն, անդրադառնալով իրեն առնչվող դատական գործին, ասել է, թե դատախազությունն ուզում է «իր կարած գործն ավարտին հասցնել»։ Սարգսյանը կոչ է արել հաջորդ դատական նիստին հետևել պաշտպանների հայտարարություններին։
Նա մեկնաբանել է նաև Ղարաբաղի էջը փակ չլինելու մասին իր հայտարարությունը՝ ասելով. «Կգա ժամանակը, պարզ կդառնա՝ ինչ ենք նկատի ունեցել»։
ԼՂ-ից տեղահանվածների վերադարձի պայմանների մասին հարցին էլ պատասխանել է. «Պետք է արցախահայությանը հարցնել, թե ինչ պայմաններում են պատրաստ վերադառնալ։ Որ վերադարձը ցանկալի է, միանշանակ է։ Բայց այնտեղ պետք է լինեն համապատասխան պայմաններ։ Թե ինչպիսի պայմաններ, չեմ կարող ասել՝ չիմանալով, չուսումնասիրելով նրանց կարծիքը»։
Սերժ Սարգսյանը դեմ է արտահայտվել Ղարաբաղի «պետական ինստիտուտների» լուծարմանը․ «Ոչ մի բան էլ չի լուծարվում։ Հետո, Հայաստանի իշխանությունները որ լուծարեցին, իրենք հավե՞րժ են լինելու։ Դա կախված է մարդկանցից, որոնք բռնի տեղահանվել են Հայաստան։ Եթե նրանք ցանկություն չունենան, ոչ մի բան էլ հնարավոր չի լինի անել»։
Սարգսյանը շեշտել է նաև, որ Շահրամանյանի ստորագրած հայտարարությունը, որով ԼՂՀ–ն լուծարվում է, ոչինչ չի նշանակում․ «Որևէ մեկի հայտարարությամբ չի կարող ԼՂՀ–ն լուծարվել»։
