Քաղաքական
«Չեմ կարող ասել, թե բավարարված եմ ընդդիմության աշխատանքով». Քոչարյան
Նախկին նախագահ Ռոբերտ Քոչարյանի որդին՝ ԱԺ «Հայաստան» խմբակցության պատգամավոր Լևոն Քոչարյանն, անդրադարձել է ընդդիմության քայլերին։ Նա ասել է, թե բնակչության մի զգալի հատվածի համար ընդդիմության շատ կտրուկ գործողությունները, հնարավոր է, լավ չեն ընդունվում․
«Այս պահին, կարծում եմ, կարևորը իշխանության, կառավարության սխալները վերհանելն է: Մեր բնակչության մեծ մասը, կարծում եմ, գործընթացներից լավ տեղյակ չէ, կամ ինչ-որ բաներ կան, որ լավ չի պատկերացնում: Ընդդիմության խնդիրն այդ ամենն ավելի ակնառու դարձնելն է»,-լրագրողների հետ ճեպազրույցում ասել է Քոչարյանը։
Անդրադառնալով դիտարկմանը, թե ընդդիմությունն իշխանության սխալները ցույց տալու նպատակով չէ, որ մասնակցում էր ընտրությանը, այլ իշխանությունը տապալելու խոստում էր տվել, պատգամավորն ասաց, որ ընդդիմությունը ընտրությանը մասնակցում է նախ և առաջ այն հույսով, որ կկարողանա իշխանություն ձևավորել․ «Եթե ընդդիմությանը չի հաջողվել այդ մեծամասնությունը ձևավորել, նա գնում է ավելի երկար ճանապարհով, որի մեջ մտնում է նաև իմ ասածը»,-նշեց նա:
Քոչարյանը նշել է, թե չի կարող ասել, որ բավարարված է ընդդիմության աշխատանքով. «Բայց դա չի նշանակում, որ չպետք է փորձել սեփական սխալներն ընդունելու եղանակով ավելի ճիշտ առաջ շարժվել»:
