ԱՄՆ-ն հետևում է ՀՀ սահմանին Ադրբեջանի զինված ուժերի և զինամթերքի տեղաշարժերին
Քաղաքական
15 Նոյեմբերի, 21:42
ԱՄՆ Կոնգրեսի արտաքին հարաբերությունների հանձնաժողովում ընթացող «Լեռնային Ղարաբաղի ապագան» խորագրով քննարկմանն ԱՄՆ պետքարտուղարի՝ Եվրոպայի և Եվրասիայի հարցերով օգնական Ջեյմս Օ՛Բրայենը հայտարարել է, որ կկենտրոնանան 3 ուղղությունների վրա՝ ինչպես են հոգ տանելու սեպտեմբերին իրենց տները հարկադրաբար լքած մարդկանց նկատմամբ, ինչպես են աջակցելու Հայաստանին և ինչպես են հասնելու խաղաղության։
Նա ընդգծել է, որ տարածաշրջանում այս հակամարտությունը ԽՍՀՄ-ի և Ռուսաստանի ներգրավվածության ժառանգությունն է:
«Մենք գործ ունենք դարեր ի վեր այդ դերակատարության հետ, խոսքը հատկապես վերջին երեք տասնամյակի մասին է: ԼՂ-ից հեռացել է ավելի քան 100 հազար մարդ, ուստի պնդում ենք, որ նրանք պետք է հասանելիություն ունենան այդ տարածաշրջանին, եթե ցանկանան»,- նշել է նա։
Օ՛Բրայենի խոսքով՝ իրենք աշխատում են այդ ուղղությամբ և ուզում են, որ ԼՂ հայերն ընտրության իրավունք ունենան։
«Բացի այդ, Միացյալ Նահանգները՝ պետքարտուղարի հանձնարարությամբ, համապարփակ և թափանցիկ զեկույց է պատրաստում Լեռնային Ղարաբաղում տեղի ունեցածի վերաբերյալ։ Մենք անկախ հետաքննողներ ենք վարձել, նաև մեր հետաքննողներն ունենք, որոնք տեղում աշխատում են, կան տեղեկություններ հասարակական կազմակերպություններից, և երբ զեկույցը պատրաստ լինի, արդյունքները բաց կներկայացնենք։ Ժամկետներ չեմ կարող ասել»,- նշել է նա։
Ջեյմս Օ՛Բրայենը հայտարարել է նաև, որ աշխատում են Հայաստանին աջակցելու հարցում։ «Կարծում եմ՝ մենք կօգնենք Հայաստանին հաղթահարել այս դժվարին իրավիճակը։ ԵՄ-ի հետ աշխատում ենք՝ Հայաստանին առաջիկա ամիսների ընթացքում աջակցություն առաջարկելու ուղղությամբ»։
Եվրոպայի և Եվրասիայի հարցերով օգնական Ջեյմս Օ՛Բրայենը տեղեկացրել է, որ աշխատում են նաև խաղաղության համաձայնագրի ուղղությամբ:
«Առաջիկա երկու շաբաթը հույժ կարևոր է լինելու այս առումով կողմերի պատրաստակամությունն ստուգելու համար: Բանակցություններում ամենադժվարն «այո» ասելն է: Մենք հստակ հասկացրել ենք, որ սեպտեմբերի 19-ի իրադարձություններից հետո Ադրբեջանի հետ հարաբերությունները բնականոն հունով չեն կարող շարունակվել, եթե խաղաղության ուղիով առաջընթաց չլինի, ուստի չեղարկել ենք մի քանի բարձր մակարդակի այց, դատապարտել ենք Ադրբեջանի գործողությունները»,- նշել է նա:
Օ՛Բրայենը հավելել է, որ ուժի կիրառումն անընդունելի է։ «Ցանկացած միջանցք պետք է ստեղծվի միայն Հայաստանի համաձայնությամբ։ Այլ ճանապարհներով ստեղծված միջանցքներն արագ արձագանք կստանան և հաջողությամբ չեն պսակվի։ Բաքվի իշխանությունները մեզ հավաստիացրել են, որ նման մտադրություններ չունեն։ Մենք հետևում ենք զինված ուժերի և զինամթերքի տեղաշարժերին։ Ոչ մի արտառոց բան չենք նկատել»։
