Քաղաքական
«Հայրենիքի փրկության համար մղվող պայքարի բոլոր մեթոդներն արդարացված են». Իշխան Սաղաթելյան
ԱԺ «Հայաստան» խմբակցության պատգամավոր Իշխան Սաղաթելյանը հայտարարել է, թե Նիկոլ Փաշինյանի՝ երեկվա հայտարարությունն իրենց համար անակնկալ չէր:
Ըստ Սաղաթելյանի, իրենք այս մասին բարձրաձայնել են պարբերաբար. «Ըստ էության, Նիկոլ Փաշինյանը վերջին օրերին հրապարակել է Արցախը և Հայաստանը հանձնելու ճանապարհը և ժամանակացույցը: Ինձ թվում է, մայիսի 25-ին Մոսկվայում հանդես կգան եռակողմ ինչ-որ հայտարարությամբ, որից հետո այդ ամեն ինչը կշարունակվի Քիշնևում, այնուհետև Բրյուսելում կփորձի պայմանավորվել կապիտուլյացիայի նոր պայմանագրի շուրջ: Հոկտեմբերի հանդիպման մասին ևս հայտարարվել է, կփորձեն ունենալ ամբողջական կապիտուլյացիայի պայմանագիր, այնուհետև այն կվավերացնեն: Ըստ էության՝ ՀՀ բոլոր քաղաքական ուժերը, հայ ժողովուրդը, մտահոգ քաղաքացիները ունեն ընդամենը 5-6 ամիս երկիրը հանձնելու գործընթացը կասեցնելու համար», - ասել է նա։
Սաղաթելյանը նշել է, թե ընդդիմադիր ուժերը պետք է ամեն ինչ անեն, որպեսզի կանխվի նոր կապիտուլիացիոն գործընթացը։ Ըստ նրա, անհրաժեշտ է ստեղծել դիմադրության նոր շարժում Հայաստանում, Արցախում և Սփյուռքում. «Մենք ընտրության հնարավորություն չունենք՝ կամ պետք է հանձնվել, կամ պետք է պայքարել հայրենիքի փրկության համար։ Իսկ հայրենիքի փրկության համար մղվող պայքարի բոլոր մեթոդներն արդարացված են»։
Անդրադառնալով մանդատները դնելու հարցին, Սաղաթելյանն ասել է, թե այդպես խորհրդարանական ճգնաժամ չի ստեղծվելու. «Կարող է մանդատները դնելուց հետո նույն մարդիկ ասեն՝ գիտեիք, որ կապիտուլյացիայի պայմանագիրն այս խորհրդարանում է ընդունվելու՝ դրեցիք, թռաք»:
