Քաղաքական
«Այս տարածաշրջանում խաղաղության հաստատումն անհնար է առանց Թուրքիայի». Ալեն Սիմոնյան
ԱԺ նախագահ Ալեն Սիմոնյանը Թուրքիայում լրագրողների հետ հանդիպմանն անդրադարձել է հայ-ադրբեջանական հարաբերություններին։
Նա շեշտել է, որ Հայաստանը որևէ տարածքային պահանջ չունի Ադրբեջանի նկատմամբ. «Մենք պատրաստ ենք և հետաքրքրված խաղաղության պայմանագրի կնքման հարցում։ Մենք որևէ խնդիր չենք տեսնում առևտրի համար տարածաշրջանը բացելու հարցում։ Ադրբեջանից Նախիջևան, ինչպես նաև Թուրքիա բեռները կարող են տեղաշարժվել ազատ՝ իհարկե, հաշվի առնելով Հայաստանի օրենսդրությունը և ինքնիշխանությունը»։
Ըստ Սիմոնյանի՝ Հայաստանն Ադրբեջանին մշտապես առաջարկել և առաջարկում է սահմանին տեղակայված զորքերի հայելային ետքաշում. «Այս տարածաշրջանում խաղաղության հաստատումն անհնար է առանց Թուրքիայի, և մենք լիահույս ենք, որ Թուրքիան գործուն քայլեր կձեռնարկի տարածաշրջանում խաղաղության հաստատման հարցում»։
