Քաղաքական
«Իրենք իրենց առջև դրված խնդիրը կատարում են». ԳՇ պետը՝ ԵՄ դիտորդական առաքելության մասին
«Այժմ սահմանային իրադրությունը գնահատվում է հարաբերականորեն կայուն, բայց Սյունիքի, Գեղարքունիքի ուղղություններում գրանցվում են հրադադարի ռեժիմի խախտումներ։ Ընդ որում, հակառակորդի կողմից հրադադարի ռեժիմի խախտման նպատակը միշտ իրավիճակը լարված պահելն է, բայց մեր կողմից գտնվում է հսկողության տակ», - Ջերմուկում լրագրողների հետ զրույցում նշել է Հայաստանի զինված ուժերի գլխավոր շտաբի պետ Էդվարդ Ասրյանը:
Ասրյանը բարձր է գնահատել ԵՄ դիտորդական առաքելության աշխատանքը Հայաստանում. «Բոլոր առաջացած հարցերը, խնդիրները լուծում ենք պատշաճ մակարդակով: Առաջին հերթին մենք ստանձնում ենք նրանց ռազմական անվտանգության ապահովումը ինչպես տեղանքում աշխատելու, այնպես էլ երթևեկությունների ժամանակ, և նաև մեր առջև դրված մյուս հարցերի շուրջ ենք համագործակցում: Եռամսյա ժամկետում, մեր աշխատանքի արդյունքով, նաև դիտորդական առաքելությամբ պայմանավորված, կարող եմ ասել, որ իրենք իրենց առջև դրված խնդիրը կատարում են»,-ասել է ԳՇ պետը:
