ԱԺ ՔՊ խմբակցության պատգամավոր Անդրանիկ Քոչարյանն, անդրադառնալով Տեղ գյուղի մոտակայքում Ադրբեջանի ագրեսիային, նշել է, որ ՀՀ զինված ուժերն իրականացրել են իրենց առջև դրված խնդիրը և կանգնեցրել հակառակորդի սադրանքները․ «ՀՀ վարչապետի հանձնարարականները չեն կարող չկատարվել, պարզապես կարող են թերություններ լինել: Եվ մենք հետամուտ ենք, որ դրանք բացահայտվեն, մեղավորները պատժվեն»,- ասել է Քոչարյանը՝ հավելելով, որ հանձնարարականներ չէին կարող տրված չլինել․ դրանք տրվել են հակառակորդի առաջխաղացումից առաջ:
Անդրադառնալով նախորդ օրը ԱԺ-ում ԶՈւ ղեկավար կազմի՝ ԳՇ պետի մասնակցությամբ կայացած փակ հանդիպմանը՝ պատգամավորն ասաց, որ քննարկումը միտված է եղել նման իրավիճակները բացառելուն, ոչ թե մեղավորների գտնելուն․ «ՀՀ զինված ուժերը հակահարված տվեցին․ եթե ԶՈւ-ն նման կեցվածք չունենար, ադրբեջանական ուժերը շատ ավելի խորք կթափանցեին ու կտեղակայվեին այնտեղ: Հետագայում պետք է ելնենք նրանից, որ ԶՈւ կարողությունները, ուժը, բովանդակությունը պետք է լինեն այն մակարդակի վրա, որ լուծի իր առջև դրված խնդիրը: Այն, ինչ մերն է, մերն է, եթե դրանից ավել հակառակորդը ոտնձգություն անի, պետք է իմանա, որ հարված է ստանալու: Եվ այդտեղ իշխանությունների հանձնարարական լինել-չլինելը նշանակություն չունի, ԶՈւ-ն իր առջև դրված խնդիրն առանց հանձնարարականի էլ պետք է իրականացնի»,- շեշտել է Քոչարյանը։
