Էրդողանի հետ հանդիպումը և հեռախոսազրույցը գնահատում եմ դրական, քանի որ Թուրքիայի նախագահի և իմ ասածները, խոսույթներն անհամատեղելի չէին։ Այս մասին Հանրայինի եթերում ասաց ՀՀ վարչապետ Նիկոլ Փաշինյանը։
«Եթե լինի հետևողական աշխատանք, քաղաքական կամք և ցանկություն, ապա այդ խոսույթները կարող են համադրվել, ինչը նշանակում է հարաբերությունների կարգավորում»,–ասաց Փաշինյանը։
Նա հավելեց․ «Իմ տպավորությունն այնպիսին է, որ Ադրբեջանն ուղղակի խոչընդոտում է Հայաստան-Թուրքիա հարաբերությունների կարգավորմանը՝ առանց դրա հիմնավորման համատեքստ ունենալու»։
Ինչ վերաբերում է Իրան-Ադրբեջան հնարավոր կոնֆլիկտին, վարչապետը նշեց, որ պետք չէ չափազանցությունների գիրկն ընկնել։
«Իրանը և Ադրբեջանը բարեկամական երկրներ են։ Իհարկե, Իրանը միջազգային և տարածաշրջանային հարցերում կարևոր դերակատար է նաև մեզ համար։ Երբ ավարտվի երրորդ էլեկտրագծի շինարարությունը, Իրանից ավելի շատ գազ վերցնելու հնարավորություն կունենանք, որպեսզի ավելի շատ էլեկտրաէներգիա մատակարարենք»,- ասաց Փաշինյանը:
Վարչապետը նաև հավելեց, որ այս դեպքում Ռուսաստանի հետ որևէ հակասություն լինել չի կարող:
